Жыл сайын 300-ден астам қазақстандық қатерлі ісікке ем іздеп шетел асады, деп хабарлайды 24KZ. Көбіне Оңтүстік Корея, Түркия, Германия, Израиль, Қытай, Үндістан және Ресей клиникаларына табан тірейді. Алайда шетелде ем алу нәтижесі мен оған кететін шығын өзін-өзі ақтай ма?

Бақытбек Тоқбергенов Тараз қаласының тұрғыны. 2009 жылы ұйқы безінің қатерлі ісігіне шалдығады. «Жаман аурудың атын естігенде уайымға түскенім рас», – дейді ол. Сол сәтте-ақ шетелде ем жайлы ойлапты. Алайда дәрігермен кеңесіп, Алматыдағы онкология және радиология ғылыми зерттеу институтына келіп, операция жасатып, бес жыл қатарынан химиялық терапия қабылдайды. Қазір жағдайы жақсы. Тұрақты тексеруден өтіп тұрады.

Бақытбек Тоқбергенов, емделуші:

- «Шетелге барып емделіп, тез жазылып кетсем екен», – деп шетелден көп мәліметтер алдым. Қытайда, Кореяда, Турцияда дегендей. Сонымен дәрігермен ақылдасып, өзімнің жағдайымды ескеріп, осы жерден емімді аламын деп шештім. Мына жерде түгел дәрі тегін. 5 жылдың ішінде қанша дәрі құйылды. Қанша бізге жағдай жасалды. Тегін 10 күн жатамыз. Тамағы, дәрісі тегін. Қызметтері, өтетін КТ МРТ-ның барлығы тегін. Міне, соның арқасында жақсы нәтижелер болып жатыр. Мен айтар едім, осы жерден келіп ем алыңыздар.

«Науқастардың шетелде емделуді таңдауының басты себептерінің бірі – шетелдік клиникалардың ықпалды маркетингі», – дейді мамандар. Олар көбіне жайлы, жеке палата, жоғары деңгейлі қызмет ұсынып, пациенттерді өзіне тартады. Ол жақтағы ем бір барғанмен шектелмейді. Тағы шетел асқанға науқастың қаржысы жетпей қиналады. Ал Қазақстандағы диагностика мен емдеу хаттамалары дәл сондай. Халықаралық стандарттарға толық сай келеді.

Айша Молдашева, ҚазОжРҒЗИ басқарма төрағасы орынбасарының м. а.:

- Мысалы, Еуропа елдерімен, Оңтүстік Кореямен немесе Түркиямен салыстырғанда бізде ешқандай айырмашылық жоқ. Мұны пациенттердің өздері де растайды. Елімізде онкологиялық ауруларды емдеуде ісікке қарсы дәрілік терапия қолданылады, оның ішінде заманауи таргеттік және иммуноонкологиялық препараттар да бар. Сондай-ақ заманауи желілік үдеткіштермен, жасанды интеллект жүйесімен жабдықталған аппараттарда жүргізілетін сәулелік терапия қолданылады.

Бір айта кетерлігі бұл ем-шараның бәрі елімізде тегін медициналық көмектің кепілдендірілген көлемі аясында көрсетіледі. Диагностикалаудан бастап ем қабылдау қазақстандықтар үшін қолжетімді. Ал шетелде бұл үшін қомақты қаражат төлеуге тура келеді. Ел үкіметі бекіткен онкологиялық аурулармен күреске арналған кешенді жоспар аясында қазір диагностика мен емдеуге арналған заманауи жабдықтар сатып алынып жатыр. Сонымен қатар барлық онкологиялық клиникалар дәрі-дәрмектермен толық қамтамасыз етілген.

Виктор Ким, радиациялық онколог:

- Мұндай құрылғы Қазақстанда жалғыз. Бұған дейін ұзақ уақыт бойы біздің науқастар дәл осындай ем алу үшін өз қаражаттары есебінен шетелге шығуға мәжбүр болатын. Қазір біз бұл технологияны толық меңгердік және соңғы жарты жылда оны белсенді түрде қолданып келеміз. Нәтиже айтарлықтай. Науқастар сәулелік терапиядан әлдеқайда жеңіл өтеді. Екіншіден, ем-шарадан кейін олар күнделікті тіршілігін еш кедергісіз жалғастыра алады.

Қазақстанда жыл сайын 40 000-нан астам науқаста қатерлі ісік анықталады. «Онкологияда ерте диагностика аса маңызды», – дейді мамандар. Себебі емнің нәтижелілігі мен науқастың жазылып кетуі аурудың ерте анықталуына тікелей байланысты. Қазір онкологиялық науқастар үшін арнайы бекітілген бастапқы медициналық көмек көрсету бағыты бар. Бұл «жасыл дәліз» деп аталады. Науқастың 18 күн ішінде кезексіз жылдам әрі нақты диагностикадан өтуіне толық мүмкіндік бар.

Авторлары: Гүлжан Көленқызы, Әбен Нарымбаев