Францияның экс-президенті Николя Саркози Парижде қамауға алынды.
Ол қылмыстық ұйымға мүше болғаны және 2007 жылғы президенттік науқанын заңсыз қаржыландырғаны үшін кінәлі деп танылды. Бұрынғы мемлекет басшысы бес жылға бас бостандығынан айырылды. Енді Саркози жазасын қандай жағдайда өтейді және бұл мерзім қысқаруы мүмкін бе?
Айдана Айтбекқызы, тілші:
- Біз қазір Париждің 16-ауданындағы Саркози жұбының вилласының жанындамыз. Таңертең осы жерден экс-лидер ел астанасындағы жалғыз түрме – Ла Санте мекемесіне бет алды. Осылайша ол Екінші дүниежүзілік соғыстан кейін нақты түрме жазасына кесілген алғашқы Франция президенті болды. Таңертең экс-президент пен оның жұбайы Карла Бруниді шығарып салған қолдаушылар Марсельезаны орындап, оның есімін ұрандатты. Саркозидің өзі үйден түрмеге дейінгі жолын «айқыш жол» деп атады. Себебі ол 12 жыл бойы тергелген «ливиялық іс» бойынша кінәсін мойындаған жоқ. Естеріңізге сала кетейін, 25 қыркүйекте Саркози Ливияның бұрынғы көшбасшысы Муаммар Каддафиден 2007 жылғы сайлауалды науқанын қаржыландыру үшін миллиондаған еуро алған қылмыстық топқа қатысы бар деп танылды.
Істе өзге де айыптар болды – сайлауды заңсыз қаржыландыру, Ливияның мемлекеттік қаржысын пайдалану және парақорлыққа жанама қатысу. Бірақ бұл айыптар бойынша Саркози ақталып шықты. Ла Санте түрмесіне бара жатып, бұрынғы президент әлеуметтік желіде жариялаған жазбасында өзін «өш алу мен өшпенділіктің құрбаны» деп атады.
ЦИТАТА:
«Мен француз халқына өзіме тән берік сеніммен айтқым келеді: бүгін таңертең түрмеге отыратын адам бұрынғы президент емес, жазықсыз адам».
Айдана Айтбекқызы, тілші:
- Белгілі болғандай, экс-президент қауіпсіздік мақсатында жазасын 9 шаршы метрлік жеке камерада өтейді. Оған серуенге шығу, кітапханаға бару және қосымша ақыға теледидар қарау мүмкіндігі беріледі.
Le Figaro газетіне берген сұхбатында адвокаттары Саркози түрмеге өзімен бірге үш кітап алғанын айтты, олардың бірі Александр Дюманың «Граф Монте-Кристо» романы. Бұл шығармада еркіндігінен әділетсіз айырылған кейіпкердің тағдыры суреттеледі. Саркози 5 жылға сотталғанымен нақты қанша уақыт жазасын өтейтіні әзірге белгісіз. Түрмеге түскен бойда оның адвокаттары босату туралы өтініш түсірді. Олар оң шешімге үміттенеді.
Өткен апта соңында Саркозидің Елисей сарайында президент Эммануэль Макронмен кездескені белгілі болды. Әлеуметтік желілердегі сынға жауап ретінде Макрон бұл кездесуді «адамдық тұрғыдан қалыпты жағдай» деп атады. Айта кету керек, Саркозиге моральдық қолдау көрсетіп жатқан өзге де француз саясаткерлері бар, соның ішінде экс-президент Франсуа Олланд та бар. Дегенмен, олардың барлығы Францияның ең маңызды қағидаты – сот билігінің тәуелсіздігіне құрметпен қарайтындарын атап өтті.
Айдана Айтбекқызы, Руслан Өміржан
