«Келер жылы әмірлік инвесторлары Қазақстанның тау-кен, мұнай-газ, металл және қор нарықтарына қомақты қаржы салуы мүмкін.
Араб мемлекеті тарапынан бұған қызығушылық жоғары». Абу-дабилік меншік капиталы саласының өкілдері осылай дейді. Сарапшылардың айтуынша, екі ел арасындағы инвестициялық ынтымақтастық жаңа кезеңге қадам басқалы тұр. Әмірліктер негізінен капитал экспорттаушы болса, Қазақстан сол қаржылай мүмкіндікті кәдеге жаратып, өнім өндіруші мемлекет. Сондықтан қос нарық бір-бірін экономикалық тұрғыда толықтыруы қажет. Биыл Біріккен Араб Әмірліктерінен Қазақстанға 1 млрд доллардан аса инвестиция тартылды. Көрсеткіш – бұған дейінгі жылдармен салыстырғанда 4 есе көбейген.
Дрю Гафф, инвестициялық компанияның басқарушы-серіктесі:
- Араб әмірліктерінде инвестициялық капитал мөлшері жоғары. Ал Қазақстан қарқынды дамып келе жатқан нарық. Инвесторларға сіздің елдің инфрақұрылым, тау-кен, өнеркәсібі, шикізат, металл және тұтынушылық тауарлар саласы тартымды. Әмірліктегі қорлар барлық бағытқа қаржы құюға қызығушылық танытып отыр.
