Мәжіліс төрағасы Ерлан Қошанов жасанды интеллект (ЖИ) саласындағы құқықтық базаны дамыту бастамасына қолдау білдіріп, осы күзде Парламенттік тыңдау өткізуді ұсынды, деп хабарлайды El.kz интернет порталы.
Екатерина Смышляеваның депутаттық сауалына пікір білдіре отырып, Ерлан Қошанов жасанды интеллект мәселесінің мемлекеттік саясаттың басым бағыттарының бірі екенін атап өтті. Оның айтуынша, мемлекет басшысы елдің цифрлық дамуын, соның ішінде ЖИ мәселелерін тікелей бақылауда ұстап отыр.
Мен депутат Смышляеваның сауалын толық қолдаймын. Бұл өте өзекті мәселе. Үкімет пен салалық министрлік те бұл бағытта ауқымды жұмыс жүргізіп жатыр. Біз, Мәжіліс депутаттары, маңызды қадам жасадық — ЖИ туралы заң жобасын бірінші оқылымда қабылдадық. Қыркүйекте оны екінші оқылымда қарауды жоспарлап отырмыз, — деді Ерлан Қошанов.
Ол биылғы күзде ЖИ енгізу және реттеу мәселелері бойынша парламенттік тыңдау өткізіп, бір алаңда халықаралық сарапшыларды, отандық әзірлеушілер мен атқарушы билік өкілдерін жинауды ұсынды. Іс-шараны ұйымдастырумен Мәжілістің бейінді комитеті айналысады.
Бұған дейін депутат Екатерина Смышляева ЖИ саласында жүйелі көзқарасты талап ететін бірқатар мәселелерді атап өткен болатын. Олардың қатарында: цифрлық стандарттар мен құқықтық механизмдердің болмауы, артық реттеулер мен трансұлттық компаниялардың үстемдік ету қаупі бар. Оның айтуынша, Қазақстандағы ЖИ дамуының тұжырымдамасы стратегиялық жоспарлау деңгейінде міндетті мәртебеге ие емес, ал жаңа технологиялар құқықтық, этикалық және кадрлық аспектілерді ескерместен енгізілуде.
Смышляева кең ауқымды енгізу алдында салалардың цифрлық жетілуіне міндетті аудит енгізуді, құқықтық «песочницаларды» кеңейтуді және цифрлық криминалистикаға деген көзқарастарды жаңартуды ұсынды.
Бұған дейін Қазақстанда бір млн адам жасанды интеллект бойынша білім алатыны туралы жазған едік.
