Ақ үй басшысы Дональд Трамп Ресей Федерациясының президенті Владимир Путинмен кездесуге қатысты ойы өзгергенін мәлімдеді.
Осыған дейін Трамп алдағы екі аптада Будапештте Путинмен кездесетінін айтқан болатын, деп жазады inbusiness.kz сайты.
Ақ үй әкімшілігі басқосу бойынша шешімді алдағы 2 күнде жариялайтынын жеткізді.
Трамптың сөзінше, Украинадағы қақтығыс үшінші дүниежүзілік соғысқа ұласуы мүмкін еді. Алайда қазір мұндай қауіп жоқ.
"Өйткені, Владимир Путин мен Владимир Зеленский де қарулы қақтығыстың одан әрі жалғасқанын қаламайды", – дейді АҚШ президенті.
Reuters дерегінше, Ресей Вашингтонға "non paper" форматында құжат жолдап, Донбастың толық бақылауын талап еткен. Бұл Трамптың атысты қазіргі шептерде тоқтату туралы ұсынысын іс жүзінде жоққа шығарады. Еуропа елдері де Мәскеу келісімге келмейінше саммитті өткізбеуге шақырып отыр.
Трамп пен Путин арасындағы тамыздағы Аляска саммиті нәтиже бермеген болатын. Енді жаңа кездесу нақты мерзімсіз кейінге қалатын түрі бар.
Кремль өкілі Дмитрий Песков: "Кездесудің дәл күні белгіленбеген, дайындық ұзақ уақыт алуы мүмкін" – деп мәлімдеді.
Еуропа жетекшілері сейсенбі күні бірлескен мәлімдеме жариялап, "Трамптың соғысты дереу тоқтату және қазіргі шепті келіссөз бастау нүктесі ретінде қабылдау" ұстанымын толық қолдайтынын айтты.
Сонымен қатар Польша Путиннің ұшағы өз әуе кеңістігін кесіп өтсе, халықаралық ордер негізінде оны қондырып, ұстауға құқылы екенін мәлімдеді. Ал Болгария мұндай сапарға өз әуе жолын ашуға дайын екенін хабарлады.
