0:00:00

0:00:00

Жаңалықтарды Telegram арнамыздан оқыңыз!

Қазақстанның қарулы қақтығыс аймақтарынан қайтарған азаматтарын оңалту және қоғамға бейімдеу тәжірибесі Венадағы БҰҰ алаңында таныстырылды. Шара Ұйымның Қылмыстың алдын алу және сот төрелігі жөніндегі комиссиясының 34-сессиясының аясында ұйымдастырылды. Басқосуға қазақстандық делегациямен бірге «Жусан» операциясы бойынша елге оралған азамат да қатысты.

5 кезеңнен тұратын «Жусан» операциясы бойынша Сириядан Қазақстанға 700 адам қайтарылды. Арасында Диана да бар. 4 баласымен елге аман-есен жеткізілген келіншек Венадағы БҰҰ мінберінде бастан кешкенін көпшілікке баяндады. Қазір бұрынғыдай емес, толық оңалған. Өзі де, діни көзқарасы да өзгерген жеке кәсіпкер.

Дана, «Жусан» операциясы бойынша Сириядан оралған Қазақстан азаматы:

Қазақстаныма, үкіметке бізді қақтығыс аймағында қалдырмай, елге жеткізгеніне алғысым шексіз. Басқа мемлекеттерді де біздің елдің тәжірибесіне сүйенуге шақырамын.

Еліміздің Сыртқы істер министрлігінің ерекше тапсырмалар жөніндегі Елшісі жиналғандарға Шам елінен жеткізілген ана мен баланы қоғамға бейімдеу шаралары жайлы баяндады. Айтуынша «Ақниет» қоғамдық қорының көмегімен елге қайтарылғандардың 80 пайызы оңалып, қазір өмірден өз орнын тапқан. Қалған азаматтармен теологтар, психологтар жұмыс істеуде.

Станислав Василенко, СІМ ерекше тапсырмалар жөніндегі елші:

Біздің тәжірибенің тағы бір ұтымды тұсы – балалар шетелде дүниеге келсе де, біз олардың туу туралы куәлігіне Қазақстанда туған деп көрсеттік. Себебі мектепте, жоғары оқу орындарында, жұмысқа орналасқанда оларды кемсіту болмасын деген мақсатта. Және біз қақтығыс аймақтарында туған қазақстандық балалардың шығу тегін, олардың Қазақстанда туыстарын анықтау үшін геномдық сараптама жүргіздік.

«Әлемде бейбітшілік пен қауіпсіздікті қамтамасыз ету үшін Қазақстанның бастамасы өте маңызды» дейді халықаралық ұйым өкілдері.

Кейт Фицпатрик, БҰҰ есрткі және қылмыс басқармасының терроризмнің алдын алу бөлімінің жетекшісі:

Қақтығыс аймақтарынан оралған азаматтарды оңалту, қоғамға қайта бейімдеу өте қиын жұмыс. Қазақ үкіметі әсіресе, балалар мен әйелдерді өмірге қайта бейімдеу бойынша қыруар жұмыс атқарған. Осындай тың тәжірибесімен бөлісу өте маңызды және өзге елдерге үлкен көмек болмақ.

Елена Купчина, ЕҚЫҰ трансұлттық қауіп қатерлерге қарсы іс-қимыл жөніндегі үйлестіруші:

Тәжіриебелеріңіз құрметке лайық. Сирия мен Ирак лагерьлерінде болған бұрынғы содырлар мен олардың отбасы мүшелерін сәтті оңалту, бейімдеу жұмыстарыңыз басқа елдер үшін пайдалы болары сөзсіз.

Жаһан жұрты азаматтарын от пен оқтың ортасынан құтқарған Қазақстанның тәжірибесін терең игеруге ынталы. Сондай ақ БҰҰ мүше мемлекеттер қазақ елімен терроризм, есірткі мен қарудың заңсыз айналымы, адам саудасы, киберқылмыс, сыбайлас жемқорлықпен күресте күш біріктіруге ниетті.

Нұрсұлу Қасым