Англияның The Sun деп аталатын беделді таблоиды «Копенгагенге» қарсы өткен Чемпиондар лигасының матчынан соң «Қайрат» клубының жас вингері Дастан Сәтпаевты мақтап мақала жариялады, деп жазады Sn.kz ақпарат порталы 1bol.kz-ке сілтеп.
Британиялық журналистер алматылық талантты «Манчестер Сити» аңызы Серхио Агуэромен салыстырып, оның шеберлігіне тәнті болған.
«Сәрсенбі кешінде Дастан Сәтпаев Чемпиондар лигасының тарихында ең жас гол соққандар тізімінде үшінші орынға көтерілді. Оның алдында тек Ансу Фати мен Ламин Ямаль бар. «Копенгагенге» қарсы ойында гол соққан «Қайрат» шабуылшысы өз елінде ғана емес, «Челси» жанкүйерлері арасында да «Кішкентай Агуэро» атанып үлгерді. Оның шағын дене бітімі «Челсидің» соңғы жылдары сатып алып жүрген шабуылшыларына ұқсамайды. Бірақ допты меңгерудегі шеберлігі мен дәл әрі қуатты соққысы – кез келген клуб бас тартпайтын қасиет», – деп жазады The Sun.
Басылым «Челсидің» Сәтпаевтан бөлек Эстеван, Джованни Кенда секілді ойыншылардың да құқығын сатып алғанын тілге тиек еткен.
Сәтпаев – Чемпиондар лигасында гол соққан алғашқы қазақстандық
17 жастағы вингердің «Челсиге» ауысатыны 2025 жылдың басында ресми түрде жарияланды. Ол Чемпиондар лигасы іріктеу кезеңінде үш гол соғып, «Кайраттың» алғаш рет турнирдің негізгі кезеңіне шығуына көмектесті.
