АҚШ президенті Дональд Трамп Вашингтонда өткен C5+1 саммитінің нәтижесі туралы Truth Social әлеуметтік желісінде жазды, деп хабарлайды inbusiness.kz сайты.
Вашингтонда Ақ үй қабырғасында АҚШ Президенті Дональд Трамптың төрағалығымен Орталық Азия елдерінің көшбасшылары қатысқан саммит өтті. Кездесуге Қазақстан президенті Қасым-Жомарт Тоқаев, Өзбекстан президенті Шавкат Мирзиёев, Тәжікстан президенті Эмомали Рахмон, Қырғызстан президенті Садыр Жапаров және Түрікменстан президенті Сердар Бердімұхамедов қатысты.
АҚШ Президентінің айтуынша, бұл саммит Орталық Азия елдерімен қарым-қатынастың жаңа кезеңін ашып, өңірдің стратегиялық маңызын айқындады. Трамптың мәлімдеуінше, соңғы онжылдықтарда Вашингтон бұл аймаққа жеткілікті назар аудармаған.
"Үш онжылдық бойы менің алдымдағы президенттер бұл елдерге тиісті мән берген жоқ. Енді Еуропа, Азия және Таяу Шығыс түйіскен стратегиялық аймақтың көшбасшыларында АҚШ-тың толыққанды серіктестік орнатуға ниетті президенті бар", – деді Трамп.
Саммит барысында тараптар C5+1 платформасының 10 жылдығын атап өтті. Кездесу нәтижесінде авиация, сирек металдар өндіру, ауыл шаруашылығы, теміржол, автомобиль және технология салаларында миллиардтаған долларлық коммерциялық келісімдерге қол қойылғаны хабарланды.
АҚШ тарапының дерегінше, бұл келісімдер ондаған мың америкалық жұмыс орнын қолдауға бағытталған.
"Біздің саммит – АҚШ пен Қазақстан, Өзбекстан, Тәжікстан, Қырғызстан және Түрікменстан арасындағы жаңа әрі жарқын қатынастардың бастауы", – деп жазды Дональд Трамп өз мәлімдемесінде.
