Өз кезегінде Израиль жағы 120 палестиналықтың мәйітін қайтарды.
ХАМАС атысты тоқтату жөніндегі келісім аясында халықаралық Қызыл Крест комитеті (ХҚКК) қызметкерлеріне Газа секторындағы қирандылардың астынан табылған тағы бір израильдік тұтқынның денесін тапсырды, деп хабарлайды inbusiness.kz сайты Анадолы агенттігіне сілтеме жасап.
Израиль армиясының хабарлауынша, Қызыл Крестке қаза тапқан тұтқынның сүйегі салынған табыт берілді. Ұйым делегациясы израильдік әскери өкілдермен келісілген жерге келіп, мәйітті қабылдап алған.
Берілгеннен кейін тұтқынның денесі тұлғасын анықтау мақсатында Израильдің Ұлттық сот-медицина институтына жіберіледі.
Бұған дейін ХАМАС 10 мәйітті тапсырған болатын. Солардың бірі Непал азаматына тиесілі екені хабарланған. Ал Израиль тарапы тапсырылған мәйіттердің біреуі израильдік тұтқынға жатпайтынын мәлімдеді. Осылайша, 28 қаза тапқан тұтқынның 19-ының мәйіті әлі де Газа аумағында қалып отыр.
ХАМАС-тың қарулы қанаты – "Изз ад-Дин әл-Қассам бригадалары" өздерінде болған барлық мәйіттерді тапсырғанын, алайда Газада қалған израильдік тұтқындардың денелерін шығару үшін арнайы техника қажет екенін айтты.
