Қызылорда облысында былтыр 4 мың тоннадан астам балық өнімдері шет елдерге экспортталып, 9 миллион доллардан астам табыс түскен. Аймақта төрт-түлік саны да артып, ет өндірісі қарқынды дамып келеді. Өңірде су және балық шаруашылығы, малшылар мен ветеринария саласының мамандары кәсіби мерекеде сый-құрметке бөленді.
Қызылорда аграрлы аймақ. Биыл диқандар 190 мың гектар жерге дәнді-дақыл септі. Егіс алқаптары түгел Сырдария өзенінен су ішеді. Сондықтан, осыншама егінге су жеткізуде сала мамандарының еңбегі ерен. Жылдан жылға су үнемдеу тетіктерін пайдаланып, гидротехникалық нысандар автоматтандырылған жүйеге көшіп жатыр.
Нұрлыбек Нәлібаев, облыс әкімі:
Аймақта су үнемдейтін озық технологияны қолдану көрсеткіші 8 мыңнан аса гектарға жеткізілді. Алдағы бес жылда 24 мың гектарға жеткізу жоспарлануда. Суды үнемдеу технологияларын қолдану арқылы жалпы көлемі 4800 гектар болатын үш ірі инвестициялық жоба іске асуда.
Бүгінде аймақта мал шаруашылығы өрістеп келеді. Былтыр шаруалар 59 мың тонна ет, 39 мың тонна сүт өнімдерін шығарып, ішкі нарықты қамтамасыз еткен. Ата-кәсіпті өркендетіп, адал еңбегімен жетістікке жеткен қарапайым еңбек адамдары салтанатты шарада ұлықталып, марапат төрінен көрінді.
Закира Оралбаева, «Еңбек ардагері» медалінің иегері, сауыншы:
Жұмыс күніміз таңғы 5-тен басталып, кешкі жетіге дейін. Сауын сауамыз. Бізге қиын емес. Өйткені отбасымызда да сауын сауып, тіршілік еткен адамбыз.
Кәсіби мерекеде су шаруашылығы мекемелеріне 65 арнайы техника табысталды. Ал ветеринария саласына су жаңа 27 қызметтік автокөлік берілді. Енді бейнеті мол жұмысшы мамандар қолайлы жағдайда еңбек етіп, саланың дамуына сүбелі үлес қоспақ.
Әділбек Серікұлы
