Қылмысты топтық адам өлтіру ретінде қайта саралауды жәбірленуші тараптың адвокаты Бағдагүл Ажығалиева талап кеткен еді.
Оның сөзінше, қазіргі уақытта негізгі айып тек Абзал Шынасылға тағылып отыр, деп хабарлайды inbusiness.kz сайты.
Адвокат Шерзат Полатты ісінде барлық айыпталушының әрекетін ерекше қатыгездікпен жасалғанын сөз етті.
– Айыптау актісіне сай, Шынасыл Абзал "Қамажай" дүкенінің солтүстік-батыс бұрышында 2024 жылдың 4 қазанында сағат 00:42-де кәмелетке толмаған Шерзат Полаттың өмірлік маңызы бар органы болып табылатын сол жақ жүрек тұсына қасақана түрде бір рет ас пышағын сұғып алған. Саладарынан Полат өзіне келтірілген ауыр дене жарақатын сезіп, қашқанымен 45-50 метрден кейін жағдайы нашарлап, асфальтке отырып қалған. Сол кезде анасы Бишимбиева соған бармақшы болған кезде оның алдынан Ілиясов пен Шынасыл шығып, жібермей қойған, – деді Б.Ажығалиева.
Ол шабуылдың ұйымдасқан сипатта болғанын сөз еткен. Әрі Шерзат Полаттың "Нұрқанат аға, маған бірдеңе тығып алды" деп айтқанын, оған ағасы Нұрқанат Ғайыпбаевтың барғанын, жарақатты көрісімен "жедел жәрдем" деп айғайлағанын еске салады.
– Осыдан кейін Әскентай, Тоқтаубаев, Белғожаев, Ілиясов, Сакиев және Шынасылдан құралған топ жол бойында отырған Н.Ғайыпбаев пен кәмелетке толмаған Ш.Полатқа барған. Бишимбиеваның баласына жетіп, қорғағанына қарамастан, Белғожаев Шерзаттың басынан аяқпен теуіп, алдын ала дайындап келген жиналмалы бәкінің сабымен бірнеше рет соққы жасаған. Ал Ілиясов мылтықтың сабымен Шерзаттың басынан бір рет ұрған. Бірақ, бұл соққы Бишимбиеваның оң жақ қолына тиген. Осы уақытта қалғандары Ғайыпбаев пен Полатты қолмен де, аяқпен ұрған-тепкен. Сағат 01:30-да Шерзат Талғар ауруханасында көз жұмды, – деп қоса кетті адвокат.
Адвокат прокурорға жаңа айыптау актісін дайындауға уақыт беру үшін сот отырысын кейінге қалдыруды сұраған.
– Ұсынылған дәлелдерге сүйене отырып, Әскентай, Н.Тоқтаубаев, Белғожаев және Ілиясовтың әрекеттері 293-баптың 3-бөлімі, 24-баптың 3-бөлімі және 99-баптың 2-бөлімі "Топ болып, ерекше қатыгездікпен кісі өлтіруге оқталу" бойынша саралануы тиіс деп санаймыз. Сакиевке 99-бап бойынша қатаңырақ жаза тағайындауға негіз жеткілікті деп санаймыз, – деді адвокат.
Десе де, прокурор Дана Сәрсенбай тергеу барысында барлық материалдар мұқият зерттелгенін айтып, мұның қажеттілігі жоқ екенін алға тартты.
– Жәбірленушілердің өтінішхаттарын қанағаттандырусыз қалдыруды сұраймыз. Себебі, тергеу барысында барлық істері, материалдар белгіленген. Алдын ала тыңдауды тағайындаудың да қажеттілігі жоқ деп санаймыз. Бұл бойынша ұсынысымыз жарыссөзде анық айтылады, – деді мемлекеттік айыптаушы.
Өз кезегінде сот Ержан Жанұзақов екі тарапты тыңдап, айыптауды қайта саралау туралы өтінішті қанағаттандырудан бас тартты.
– Алдын ала тыңдау өткізуге негіз жоқ болғандықтан, қанағаттандырудан бас тартуға. Қылмыстық іс жүргізу кодексінің 340-бабына сәйкес, басты сот талқылау тек сотталушыларға және олардың сотқа берілген айыптау шеңберінде жүргізіледі. Айыпталушылардың кінәлі немесе кінәсіз екендігі кеңесу бөлмесінде ғана шешіледі. Мемлекеттік айыптаушылар қажет деп тапса, өтінішхат берсе ғана жаңа айыптау актісін дайындауға уақыт берілуі мүмкін, – деп түсіндірді ол.
Сонымен, сот жәбірленуші тараптың өтінішін қанағаттандырмады. Іс бұған дейін тағылған айып шеңберінде қаралмақ.
