Ішкі істер министрлігінің қызметкерлері «STOP-трафик» жедел-алдын алу іс-шарасы аясында адам саудасына байланысты бірқатар ауыр қылмыстың жолын кесті. Барлығы 39 факт тіркелді, соның алтауы – кәмелетке толмағандарға қатысты, деп хабарлайды Egemen.kz министрліктің баспасөз қызметіне сілтеме жасап.
Алматы қаласында жаңа туған нәрестелерді сатумен айналысқан қылмыстық топтың әрекеті тоқтатылды. Қылмыстық топтың ұйымдастырушылары қиын жағдайға тап болған жас қыздарды пайдаланған және сыйақы беру арқылы сәбилерді үшінші тұлғаларға беруге итермелеген. Барлық күдіктілер ұсталды. 20-дан астам қылмыстық іс бойынша тергеу жүріп жатыр. Күдіктілерге мүлікті тәркілеумен 18 жылға дейін бас бостандығынан айыру жазасы қарастырылған.
Абай облысында азаматтарды мәжбүрлі түрде еңбекке тарту арқылы қанаумен байланысты қылмыстық әрекет әшкереленді. 11 қылмыстық іс қозғалды, материалдар сотқа жолданды.
Шымкент, Ақтөбе, Жамбыл, Батыс Қазақстан, Қарағанды және Қостанай облыстарында түнгі ойын-сауық орындарына жүргізілген тұрақты тексерулер барысында, оның ішінде кәмелетке толмағандарды түрлі қанау түрлеріне тарту фактілері анықталып, тоқтатылып жатыр.
Астана қаласында полицейлер прокуратурамен бірлесіп Гете көшесіндегі теміржол вокзалы маңында рейдтер өткізді. Нәтижесінде азаматтарды сексуалдық қанауға арналған притондар ұйымдастыру және оны ұстау бойынша сегіз адам қылмыстық жауапкершілікке тартылып жатыр.
Ақмола облысында отбасылық құндылықтардан бас тартуды және ретсіз жыныстық қатынасты насихаттайтын «рухани орталық» ашқан діни топтың әрекеті тоқтатылды. Тінту барысында діни әдебиеттер, атрибуттар және рәсімдік заттар тәркіленді. Тиісті сараптамалар тағайындалып, тергеу жүргізіліп жатыр.
Бұған дейін Астана, Алматы және Шымкент қалаларында «элиталық эскорт» ұйымдастырушыларының әрекеті әшкереленген. Олар түнгі клубтар мен барларда жас қыздарды жұмысқа тартумен айналысып, жезөкшелікке делдалдық жасағаны анықталды. Қылмыстық істер сотқа жолданды.
Сонымен қатар, Алматы мен Астанада түнгі мекемелерде профилактикалық рейдтер өтті. Рейдтердің мақсаты – жастарды қылмыстық қанаудан қорғау, олардың асоциалды ортаға тартылуына жол бермеу және қоғамдағы адамгершілік құндылықтарды нығайту.
Жалпы кешенді профилактикалық жұмыс жалғасады.
