Жетісу облысы Ескелді ауданындағы Бақтыбай ауылында орналасқан Мәдениет үйін күрделі жөндеу кезінде бюджет қаражатын жымқыру дерегі бойынша қылмыстық іс қозғалды, деп хабарлайды Egemen.kz.
Тергеу мәліметінше, Бақтыбай ауылындағы Мәдениет үйін күрделі жөндеуге жергілікті бюджеттен 750 миллион теңгеден астам қаражат бөлінген. Тиісті келісімшарт аудандық ішкі саясат бөлімі мен мердігер ұйым арасында бес жыл бұрын жасалған.
Жоба бойынша жұмыстар 2021 жылдың соңына дейін аяқталуы тиіс болғанымен, нысан осы уақытқа дейін пайдалануға берілмеген. Соған қарамастан, мердігерге бюджет есебінен 200 миллион теңгеден астам қаражат төленген.
Қаржылық мониторинг агенттігінің ресми өкілі Ернар Тайжанның айтуынша, тергеу барысында бұрын қабылданып, актілер арқылы төленген бірқатар жұмыстардың іс жүзінде орындалмағаны анықталған.
— Тергеу нәтижесінде мемлекетке келтірілген залал көлемі 212 миллион теңгеден асты. Күдіктілердің мүлкіне шектеу қойылды. Қылмыстық іс бойынша тергеу амалдары жалғасып жатыр, — деді ол.
Аудан әкімдігінің мәліметіне сәйкес, Бақтыбай ауылындағы Мәдениет үйі Кеңес Одағы кезеңінде салынған және сол уақыттағы ең ірі мәдени нысандардың бірі саналған. Ғимараттың жалпы аумағы 4 246 шаршы метрді құрайды.
Қылмыстық іс бюджет қаражатын жымқыру фактісі бойынша тергеліп жатыр.
