Блогер Әлия Әшім тағы да үлкен сынның астында қалды.

Құйрық-бауыр жеу Әзірет Әли кезінен бастап сақталғанын айтқан блогер көпшілікке жақпай қалды, — деп хабарлайды Caravan.kz медиа порталы.

Әлия Әшім бұл салтқа байланысты былай деп түсініктеме берген:

”Қазіргілердің ойлап тапқан дүниесі ма деп ойласам. Бұл Әзірет Әли кезінен сақталған салт екен. Әзірет Әли келін түсірген кезде отыз күн ойын, қырық күн тойын жасап, құдаларға малдың етіне бата жасатып, кәделі жілігін түгел асатады. Сосын балбырап піскен қойдың құйрығын турап, үстіне бауыр турап араластырып айран қосып, құдалардың алдына тосады. Ұн жағады беттеріне. Құда болдық, Құдай дестік. Енді құйрық бауыр сияқты жақын болайық деп Әзірет Әли құдалығын дәл осы кәдемен бекіткен көрінеді. Сол сәттен, сол жағдайдан бастап бұл салт халық арасында кең таралып, құдалармен құйрық бауыр жеу деп аталып кеткен көрінеді”.

Осыған байланысты Самат Құсайынов есімді Facebook қолданушысы блогерді сынға алып, жазба қалдырды.

”Мына ақылгөйлерді тыңдап Қазақта дәстүр, мәдениет болды ма деген жаман ой келді.

Әрине, болды. Тіпті өте бай болды. Қазақ халқы – тамыры тереңге кеткен көшпелі өркениеттің иесі.

Салт-дәстүрі – бесікке салу, тұсау кесу, қыз ұзату, келін түсіру, ас беру, т.б.

Ұлттық мәдениеті – киіз үй, күй өнері, жыршылық, зергерлік, ұлттық киімдер мен тағамдар.

Әдеп-ғұрпы, тыйымдары – бала тәрбиесінен бастап, үлкенге құрмет, әйел затына ізет, жер мен елге деген адалдық.

Мұның бәрі – қазақтың өзінікі. Ешкімнен көшірмеген.

Ал қазір не болып жатыр?

Иә, бүгінгі қоғамда:

Шеттен келген уағызшылардың сөзін ақиқаттай қабылдап, ата-баба дәстүрін «ширк», «жалған» деп шеттетіп жүргендер бар.

Біреудің дәстүрін «таза ислам» деп өзіміздің исламдық тұрғыда қалыптасқан ұлттық танымды жоққа шығарушылар бар.

Елге танылса болды, тектілік емес, трендке ілесуді мақсат еткен жандар бар.

Кейбіреулер расында да ақылы насихат айтып, сырт көзге «көсем» кейпінде жүрген сияқты көрінеді.

Бұл қайдан шықты?

Ұлттық иммунитет әлсіреп бара жатыр. Тіл, тарих, дәстүрді білмейтін ұрпақ көбейгенде, сырттан келген әсер тез сіңеді.

Медиа құралдары арқылы манипуляция жасау оңай. Көпшілікке әсер ету үшін шындық емес, «шулы пікір» жеткілікті.

Қоғамда бос кеңістік бар – ұлттық бағыттағы шынайы тұлғалар азайғанда, жалған көсемдер орын басады.

Не істеу керек?

Қазақтың дәстүрі мен мәдениетін тек шеттен емес, өз түп-тамырынан іздеу керек

Көпшілікке сөз айтып жүрген әр адамға сын көзімен қарау, тексеру керек

Ал бұл — жай қателік емес, кейде саналы түрде жасалып жатқан іс те болуы мүмкін”, — деп жазды ол.