Ресей мен Қазақстан арасында теміржол тасымалының көлемі ұлғаймақ. Бұл туралы қос елдің ынтымақтастық жөніндегі Үкіметаралық комиссияның XXVI отырысында айтылды. Оған қыркүйекте Достық-Мойынты учаскесінде екінші жолдардың іске қосылуы және Қытай-Еуропа-Қытай бағытындағы транзит көлемінің артуы себеп.
Жиында «Солтүстік-Оңтүстік» халықаралық көлік дәлізін дамытуға одан әрі жәрдемдесу туралы уағдаластыққа қол жеткізілді. Сондай-ақ тараптар халықаралық жүк тасымалы кезінде қиындық тудыратын заң нормаларын түзетуге уағдаласты. Агроөнеркәсіп пен отын-энергетика, қаржы, мұнай және газ, атом энергетикасы, стандарттау және метрология, туризм мен білім беру, байланыс салаларындағы ынтымақтастық мәселесі де талқыланды.
