8 қарашада Барселонаның әйгілі Олимпиялық аренасы – Olimpic Arena Badalona мыңдаған тыңдарманға толды. Олар Қазақстанның халық әртісі Димаш Құдайбергеннің Испаниядағы тұңғыш жеке концертін тамашалауға келді. Димаш жанкүйерлер арасында қазақ ұлттық көйлегін киіп келген жас қызды байқап, оның арманын орындады, деп хабарлайды dimashnews.com.
Көрермендер "Оле, Димаш, Оле!" деп ұрандатып, өз клубтарының түстеріндегі киіммен "толқын" жасап, сахнаға шығатын сүйікті әртістерін шат көңілмен қарсы алды. Содан кейін Қазақстан Республикасының Мемлекеттік әнұраны орындалып, залдағы көрермен орындарынан тік тұрып құрмет көрсетті.
Ақ костюм киіп, сахнаға шыққан Димаш шоуын бірлік пен үмітке толы "Біз бәріміз алтынбыз!" әнімен бастады. Бұған дейін Майкл Джордан сынды әлем жұлдыздары өнер көрсеткен бұл сахнада Димаштың энергетикасы бұрынғыдан да жарқырай түсті.
Димаш көрермендерін қазақ, ағылшын тілдерінде ғана емес, сондай-ақ испан тілінде де жылы қарсы алды.
"Баршаңызға қайырлы кеш! Бұл – Испаниядағы менің алғашқы концертім. Осында сіздермен бірге болу – мен үшін үлкен құрмет. Барлығыңызға үлкен рақмет!", — деді ол.
Залда қазақтың ұлттық киімін киген жас қызды байқап қалған Димаш оны сахнаға шақырды. 15 жастағы жас әнші Жанель Али сүйікті әртісімен бірге "Ұмытылмас күн" әнін орындады.
Ол — Димаштың үлкен жанкүйері және Испаниядағы фан-клубының мүшесі. Клубтан шақырту алған Жанель pre-party іс-шарасында "Ұмытылмас күн" мен "Махаббат бер маған" әндерін орындаған.
DimashNews редакциясына берген сұхбатында Жанель өзі туралы айтып берді.
"Атым — Жанель Али, жасым 15-те. Туған жерім — Қазақстан, Астана қаласы. Балалық шағымнан бері ән айтуға әуеспін, сондықтан Қазақ ұлттық өнер академиясына эстрадалық вокал мамандығына түстім.
2022 жылы отбасымызбен жұмыс бабымен Испанияға, шуақты Аликанте қаласына көшіп келдік. Сол жылы мен "Голос дети Испания" жобасына қатысып, Кристина Агилераның Hurt әнін орындап, 12 жасымда финалға шықтым. Қазір Испания консерваториясында опера әншісі мамандығы бойынша білім алып жүрмін.
Кішкентайымнан Димашпен бір сахнада ән айтуды армандадым. Бүгін сол арманым орындалды. Әрине Димаш мені сахнаға шақырғанда қуаныштан толқып, көзіме жас келді, айтқым келген сөздерімді ұмытып та қалдым. Ал шын мәнінде, мен бүкіл әлемге халқымызды мақтан ететінімді және Димаш арқылы Қазақстан мәдениеті жаһанға танылып жатқанын айтқым келді", — дейді ол.
Кештің ең әсерлі тұстарының бірі – Dears жанкүйерлерінің Elegimos la Vida ("Біз өмірді таңдаймыз") акциясы болды. Димаш The Story of One Sky реквиемін орындап тұрған сәтте, көрермендер ақ қолғаптарын жоғары көтеріп, бейбітшілік пен үміттің, тазалықтың символын көрсетті.
Димаштың Stranger атты әлемдік туры жалғасып жатыр. Жақын арада Димаш пен оның командасы Лондон мен Берлинде жанкүйерлерімен қайта жүздеседі.
Мәтіннен қате тапсаңыз, бізге жазыңыз
