Біреудің жеке суреті, мессенджердегі хат-хабары мен аудиожазбасын иесінің келісімінсіз жариялау жеке өмірге қол сұғу болып есептеледі.
Мессенджерде жазылған хаттарды өзгеге жолдауды әдетке айналдырған болсаңыз, абай болыңыз, деп хабарлады 31 арнаның Информбюро ақпараттық бағдарламасы.
Жеке мәліметті үшінші тұлғамен рұқсатсыз бөлісу адам құқығына қол сұғу болып саналады. Және бұл әрекет үшін заң алдында жауап беруіңіз әбден мүмкін.
Біреудің жеке суреті, мессенджердегі хат-хабары мен аудиожазбасын иесінің келісімінсіз жариялау жеке өмірге қол сұғу болып есептеледі. Сондықтан жеке деректерді үшінші тұлғаға жібермес бұрын автордан рұқсат алу керек. Олай болмаған жағдайда заң тұрғысынан нақты жаза қарастырылған.
"Жеке хабарламалар, суреттер, мәліметтер оның барлығы жеке өмірдің құпиясы болып танылады. Бұл үшін Қылмыстық Кодекстің 147-бабына сәйкес екі жылға дейін бас бостандығыңнан шектелесің немесе айырыласың. Бірақ бұл қылмыстық істерді қозғау және өзіңнің құқығыңды қорғау тікелей сотқа жүгіну арқылы таратқан адамды қылмыстық жауапкершілікке тарта аласың", – деді заңгер Бағдат Амандосұлы.
Ал бірнеше адам хат алмасатын чаттарға қатысты заң талабы басқа дейді заңгер.
Маманның сөзінше, ондай топтар ашық және жабық болып бөлінеді. Егер ашық топта жазылған хабарлама азаматтың жеке өміріне қатысты құпия болмаса, онда жіберуге болатынын айтады. Ал жабық топтағы хаттарды рұқсатсыз жіберу заңға қайшы. Десе де бұл заңды халықтың бірі білсе, бірі білмейтін болып шықты.
Заңды білмеу жауапкершіліктен құтқармайды. Сондықтан кінәңіз дәлелденсе, бас бостандығыңыздан айырылудан бөлек 2000 айлық есептік көрсеткіш, яғни 7 864 500 тг-ге дейін айыппұл төлеуіңіз мүмкін.
