Мемлекет басшысы Қасым-Жомарт Тоқаев Халықаралық шахмат федерациясының (FIDE) президенті Аркадий Дворковичті қабылдады.

Кездесуде Мемлекет басшысы Ұйымның Қазақстан шахмат фе­де­­ра­ци­ясына, жаттық­тыру­шы­­­лар мен жас спорт­шыларға көр­сет­­кен қол­дауын жоғары баға­лады.

Президент елімізде шахмат спорт түрі ғана емес, зияткерлік мә­де­ниеттің, тәрбие мен білімнің ма­ңыз­ды бөлігі саналатынын атап өтті.

Мемлекет басшысы балалар мен жастар арасында шахматқа қызығушылықтың ар­тып келе жатқанына назар аудар­ды. Президенттің айтуынша, білім беру жүйесінде шах­мат инфра­құ­ры­лымын дамытуға және іл­гері­летуге баса мән беріліп отыр.

Әңгімелесу барысында ұлттық федерацияның ұйыммен жан-жақты ынтымақтастықты одан әрі кеңейту, соның ішінде ірі халықаралық жарыстар өткізу мен бірлескен жобаларды іске асыру мәселелері пысықталды.

Аркадий Дворкович Қазақ­станда қабылданған шах­матты дамытуға арналған кешенді жоспар­дың маңызы туралы айт­ты. Аталған құжат мемлекет, бизнес және ұлттық феде­ра­ция­ның бірлесіп жұмыс істеуі­не жол ашады. Сондай-ақ был­тыр қазақстандық шахматшы­лар FIDE аясында өткен барлық жарыстан ең көп медаль жинаға­нына назар аударды.

Қасым-Жомарт Тоқаев Халықаралық шахмат федера­ция­сының президенті Аркадий Дворковичті Қазақстандағы шахматты өркендетуге қосқан үлесі үшін ІІ дәрежелі «Достық» орденімен марапаттады.

Сонымен қатар Мемлекет басшысы әлем біріншіліктерінде топ жарған жас шахматшылармен кездесті. Кездесуге 8 жасқа дейінгі санатта әлем чемпиондары атанған Әдинұр Әділбек пен Алиша Бисалиева, 12 жасқа дейінгі санатта әлем чемпионы болған Данис Қуандықұлы, 14 жасқа дейінгі санатта әлем біріншілігінде жеңіс тұғырынан көрінген Марк Смирнов, 16 жасқа дейінгі санат бойынша әлем чемпионатында алтыннан алқа таққан Эдгар Мамедов, 16 жасқа дейінгі шахматшылар арасында әлем біріншілігінің күміс жүлдесіне қол жеткізген Сауат Нұрғалиев қатысты.

Мемлекет басшысының айтуынша, жас спортшылардың жетістіктері халықаралық аренада еліміздің мерейін үстем етеді әрі елімізде шахматтың келешегі зор екенін көрсетеді. Президент чемпиондардың биік мақсаттарға ұмтылуы қажет­тігін жеткізіп, оларға жарқын жеңістер тіледі.

– Шахмат деген үлкен өнер. Сондықтан шахматпен күнде­лікті, мұқият, арнайы кітаптарды оқи отырып айналысу қажет. Бүгін Халықаралық шахмат феде­рациясының президенті Аркадий Дворковичпен кез­­де­сіп отырсыздар. Бұл – сіздер­дің бақытты сәттеріңіздің бірі, – деді Мемлекет басшысы.

Кездесу соңында Қасым-Жомарт Тоқаев шахмат тақта­сына естелік жазба қалдырды.