Кәрі құрлық Ресей газынан толық бас тартады.
Еуропалық Парламент тиісті заң жобасын қабылдады. 500 депутат қолдап, 120-сы қарсы дауыс берді. Құжатты жаңа жылдың басында Еуроодақ министрлері ресми мақұлдауы қажет. Әзірге Венгрия мен Словакия ғана қарсылық танытып отыр. Келісімге сәйкес, Еуроодақ Ресейдің сұйытылған табиғи газын импорттауды 2026 жылдың соңына дейін, ал құбыр арқылы жеткізілетін газды 2027 жылдың қыркүйек айының аяғына дейін тоқтатады. Қазан айындағы жағдай бойынша Ресейдің Еуроодаққа газ импорты 12%-ға дейін азайған. Ал Украинамен соғыс басталмай тұрып бұл көрсеткіш 45% деңгейінде болатын. Қазір Ресейден газды Венгрия, Франция, Бельгия сатып алады.
