Жасанды тоғанда балық өсіретін шаруашылық иелеріне мемлекет тарапынан субсидия беріледі.
Арнайы құрал-жабдық сатып алса, оны да қаржыландыру жағы қарастырылып жатыр. Қызылорда облысында қазір 80-ге жуық балық шаруашылығы бар. Субсидиялау енгізілгеннен кейін, бұл кәсіпке қызығушылар саны артады, дейді мамандар.
Мұхтар Нұртаев төрт жылдан бері тоған шаруашылығымен айналысады. Кәсіпкер жыл сайын 50 тонна сазан өсіріп, саудаға шығарады. Бір бөлігін иелігіндегі көлге жібереді. Қазір кәсіп иесі өндіріс ауқымын кеңейтуге кіріскен.
Мұхтар Нұртаев, кәсіпкер:
- Проект бойынша біз 23 гектар пруд қазып жатырмыз. Біз соған жұмыс істейміз. Ол жерде де 50 тоннадан 100 тоннаға дейін бағытталған шаруашылық. Құдай қаласа келесі жылы кезең-кезеңімен қоса береміз.
Балық шаруашылығын дамыту мақсатындағы инвестициялық жобаларға мемлекет тарапынан да қолдау көрсетілуде. Биыл Қызылорда облысында бұл мақсатқа 10 миллион теңге қаржы бөлінді. Ал келесі жылдан бастап субсидия көлемі 250 миллион теңгеге дейін ұлғаймақ. Себебі аймақта тауарлы балық өсірушілердің қатары жыл сайын артып келеді,-дейді мамандар.
Ғалымжан Еркебай, облыстық табиғи ресурстар және табиғат пайдалануды реттеу басқармасының басшысы:
- Бізде балық өсіру бағыты бойынша жылына 2024 жылы мың тонна балық өсіріліп, сатылған болса, биыл мың жарым тоннаға бегітілген. Қазіргі таңда балық өсірушілердің көлемі де көбейіп келе жатыр.
Өңірде қазір 80-ге жуық тауарлы балық шаруашылығы жұмыс бар. Одан бөлек Сырдария мен Арал және 160 көлден су маржаны сүзіледі. Облыс көлемінде 10 балық өңдеу зауыты бар. Былтыр Қызылорда облысынан 13 мемлекетке 4,5 мың тонна балық өнімі экспортталды.
Нұрлан Жақыпбеков, Нұржан Мұзарапшин
