Семейдегі Abai IT-Valley технологиялық кластері ақпараттық-коммуникациялық технологиялар саласындағы жобаларды сәтті іске асырып келеді. Орталық оқыту, өзара іс-қимыл жасау және іске асыру үшін өңірлік платформа ретінде қызмет етуде. Осы арқылы еліміздегі ІТ саласын қажетті мамандарды даярлауға ден қойған. Семейлік өнертапқыштардың «Нейрондық желі орталығы» аталатын стартапы қазір Мәскеу қаласында жұмыс істеп жатыр. Кәсіпкерлік, медицина, білім саласын цифрландыруда да таптырмас тың жобалар қолға алынған.
Эпидемиолог — Еділ Омарбеков Abai IT-Valley орталығымен бірлесіп, екі бірдей бағдарлама ойлап тапқан. Оның бірі — медициналық кітапшаларды қажет ететін кәсіп иелері үшін арналған San edu порталы. Қажет құжатты енді медициналық мекемелерге бармай-ақ, онлайн алуға болады. Арнайы курстан өтіп, сұрақтарға жауап берсеңіз болды. Ал ІTRAK қосымшасы жұқпалы аурулардың таралуын толықтай бақылауға алатын бағдарлама. Дерттің өршуі, азаюы немесе эпидемиялық ахуалын сараптап отырады. Жасанды интеллект негізінде елімізде алғаш пайда болған жүйе жыл соңына дейін қолданысқа енбек. Ұқсас жоба тек АҚШ пен Қытайда ғана бар.
Еділ Омарбеков, эпидемолог:
Жұқпалы аурулар бойынша автоматты түрде күнделікті сараптама мәліметтер базасына түсіп отырады. Санитарлық бақылау мамандары жұқпалы ауруларға байланысты дер кезінде шара қолданып, алдын алады. Ерте дайын болады. Таралмауын қадағалайды. Қазір бізде бұл жұмыстар қағаз жүзінде ғана. Оның бәрін есептеп қарап отырғанда уақыт жоғалтамыз.
Ал Әнет Тұрсынжан — трекер. Ол цифрлық технологияларды қолдану арқылы кез келген саланы дамытуға қолғабыс ететін маман. Өзі де бірнеше стартапты іске асырған. Солардың бірі балаларға ұлттық құндылықтарды ерте бастан сіңіруді көздейді. 3D принтер арқылы қазақы нақыштағы ойыншықтарды өндіріске енгізіп, сатылымға шығарған. Қазір мектепке дейінгі білім беру мекемелерінен сұраныс түсіп жатыр.
Әнет Тұрсынжан, трекер:
Отбасы институты бойынша ойыншықтар жасадық. Онда апа-ата, әке-шеше және бала туралы ойыншықтар құрастырдық. Әр ойыншықтың ішінде өзіміздің комикстарымыз болады. Бұл комикстар тек қазақ тілінде. Өйткені құндылықтарды дамыту негізінде жасалған.
Осы сынды ондаған жобаны іске асырып отырған Abai IT-Valley кластері білім беру, ІТ кәсіпкерлікті дамыту, бағдарламашыларды әзірлеу сынды бағыттар бойынша жұмыс істейді. Жергілікті әкімшілікпен бірлесіп, өңірдегі түрлі саланы цифрландыруға қол ұшын соза бастаған. Қазірдің өзінде орталықтың қолдауымен түрлі жоба жемісін бере бастады.
Бауыржан Наурызбаев, Abai IT-Valley технологиялық кластерінің директоры:
Осы уақытқа дейін 50 шақты стартап бизнес инкубациядан өтті. Биыл біз 19 старапты Астана хабтың бағдарламасына бердік. Қазір оннан артығы бизнеске шығып келеді. Оның төртеуі нақты бизнесте.
Құрылғанына екі жыл ғана болған орталық арқылы ІТ саласы бойынша 600 ден астам адам арнайы курстардан өткен. Abai IT-Valley технологиялық кластері қазір өңірде өздігінен құрылған ІТ мектеп ретінде жұмысын жандандыра бастады.
Ержан Жақып
