Қала мен ауыл арасындағы білім сапасын теңестіру. Осы мақсатта Президент заманауи талаптарға сай білім ұяларын салу туралы тапсырма берген болатын. Осылайша елде жыл соңына дейін 217 мектеп бой көтеруі тиіс. Заманауи технологиялармен қамтылған білім ошақтары «Келешек мектептері» деп аталады. Бұл ауқымды ұлттық жоба қалай жүзеге асырылып жатыр?
Иә, бұл сол «Жайлы мектеп» деп бастау алған ауқымды жоба қазір Оқу-ағарту министрінің ұсынысымен «Келешек мектептері» деп аталып келеді. Айта кету керек, соңғы 6 жылда елімізде 1 млн-нан аса оқушыға арналған 1000-нан астам мектеп салынған. Бұл Тәуелсіз Қазақстан тарихындағы рекордтық көрсеткіш. Ал жаңағы Келешек мектептері – ол осы ауқымды стратегиялық бастаманың маңызды бөлігі. Басты мақсат – елде апаттық жағдайдағы, үш ауысымда оқытатын мектептерді жою.
Ғани Бейсембаев, ҚР Оқу-ағарту министрі:
- Мектептерде робототехника кабинеттері, STEM-зертханалар, хореография залдары, коворкинг аймақтары, 4 спорт залы бар, заманауи пәндік кабинеттер, алғашқы әскери дайындық үшін арнайы ашық алаңдар қарастырылған. Барлық мектеп заманауи жиһаздармен және оқу құрал-жабдықтарымен жабдықталып, әрбір оқу кабинеті үшін қажетті техникалық құралдар жиынтығы қамтамасыз етілген. Бұның барлығы ұстаздардың жұмысын жеңілдетіп, оқушылардың білім сапасын көтеруге мүмкіндік береді.
Ұлттық жоба аясында салынған мектептерде қауіпсіздік жүйелері күшейтілген. Атап айтқанда, білім ошақтары Face ID жүйесімен, заманауи бақылау камераларымен қамтамасыз етілген. Ал олардың барлығы жергілікті жердегі полиция бөлімшелерінің жедел басқару орталықтарына қосылған. Тағы айта кету керек, бастауыш және жоғары сыныптар бөлек-бөлек блоктарда оқиды. Мұның барлығы баланың қауіпсіз әрі жайлы ортада білім алуына бағытталған.
Жайық Мақсұтов, ҚР Оқу-ағарту министрлігінің Инфрақұрылымдық дамыту департаментінің басқарма басшысы:
- «Келешек мектептері» жобасы аясында 217 мектеп жоспарланған. Ол 460 мың оқушы орнын береді. 2024 жылдың қорытындысы бойынша 254 мың орынға 105 мектеп салынды. Ал қалған 112 мектеп осы жылы аяқталуы тиіс. Мүмкіндігі шектеулі балаларға барлық мектептерде инклюзия кабинеттері бар. Оның өзінің балаларға сабақ беретін құралдармен жабдықталған.
Айта кету керек, «Келешек мектептердің» жартысына жуығы ауылды жерде салынған. Бұл қала мен ауыл арасындағы білім сапасын теңістіруді көздейді. Жаңа білім ошақтарының көлемі типтік мектептерге қарағанда 15-20%-ке кең, ал техникалық жабдықталуы 4 есе жоғары.
Жоба аясында барлық мектептерде интернет желісіне кемінде 100 мегабит жылдамдықпен қосылу мүмкіндігі қамтамасыз етіледі. Бұдан бөлек, білім ошақтарының әр қабатында медиатека, электронды кітапханалар мен оқуға арналған коворкинг аймақтары бар.
Келешек мектептерінде балаларды оқытатын мұғалімдерге де талап жоғары. Ол үшін 3 мыңнан астам ұстаз біліктілігін арттыру курстарынан өткен. Ал директорларды тағайындау кезінде басымдық «Білім беру саласындағы 1000 өзгеріс көшбасшысы» жобасына қатысқан үміткерлерге беріледі. Сонымен қатар арнайы дайындалған жас мұғалімдерді де тарту көзделген.
