Атақты сазгер, дирижер әрі домбырашы Нұрғиса Тілендиевтің туғанына 100 жыл толуына орай Австриядағы қазақстандық студенттер ауқымды шара өткізді, деп хабарлайды 24KZ. Дарынды жастардың композитордың танымал шығармасы «Әлқисса» күйін орындау сәті бейнекамераға түсірілді. Бастаманы әрі қарай насихаттап, жалғастыру мақсатында бейнероликті әлеуметтік желі арқылы тарату жоспарланып отыр.
Флешмобты Бельгия, Чехия, АҚШ және Оңтүстік Кореядағы қазақстандық студенттер бірауыздан қолдап, жалғастыруға ниеттеніп отыр.
Төремұрат Бақытжан, Австриядағы қазақстандық студенттер қауымдастығының төрағасы:
- Нұрғиса Тілендиевтің ең танымал шығармасы «Әлқисса» күйін орындап, Венаның ең көрікті, ең танымал жерлерінде видеоға түсіріп, TikTok, Instagram сияқты желілерге салып, көрермен жинаймыз. Осы эстафетаны Еуропадағы қазақ студенттеріне және әлем бойынша жердің түкпір-түкпірінде жүрген қазақ студенттеріне жолдаймыз.
Әділжан Ерзат, қазақстандық студент:
- Негізінде домбыраны белгілі бір консерваторияда оқығаным жоқ. Өзім үйрендім. Осы біздің тұрып жатқан үйімізде көршіміз домбырадан сабақ беретін еді.
