"Атамекен" Ұлттық кәсіпкерлер палатасының бұрынғы төрағасы, алаяқтық үшін сотталған Аблай Мырзахметов Павлодар қаласының қылмыстық істер жөніндегі ауданаралық сотына жолдаған шартты түрде мерзімінен бұрын босату туралы өтінішін қайтарып алды, — деп хабарлайды Massaget.kz тілшісі .
Аталған өтініш 2 мамыр күні сотқа түскен, ал оны қарау 28 мамырға жоспарланған болатын. Алайда сот отырысы өтпеді.
"Материал қараусыз қайтарылды: сотталған азамат өтініш жазып, өз өтінішін қайтарып алды", – деп хабарлады Павлодар облыстық сотының баспасөз қызметі.
Ведомствоның түсіндіруінше, шартты түрде мерзімінен бұрын босатылуға құқығы бар сотталғандар әр алты ай сайын осындай өтініш бере алады.
"Енді бұл сотталған азамат дәл осындай өтінішті алты айдан ерте бере алмайды. Бірақ егер ол жаза түрін жеңілдету туралы басқа өтініш жолдаса, оны ертерек қарауға болады", – деп толықтырды сот өкілдері.
Айта кетейік, қазіргі уақытта Аблай Мырзахметов Павлодар облысындағы №46 мекемеде жазасын өтеп жатыр.Биыл көктемде бұл колонияда биг-бэг қаптарын шығаратын тігін цехы ашылған. Бұл іс-шараның видеосын Бас прокуратураның Telegram-арнасы жариялаған еді.
Бейнежазбада Мырзахметов колонияда еңбек етіп жатқанын айтып, былтыр қыркүйекте шағын топпен бірге өндіріс ашқанын, инвестор тапқанын және жарты жыл ішінде 120 жұмыс орнын құруға көмектескенін мәлімдеген. Сотталғандар спорттық киімдер тігіп, ағаш және металл бұйымдарын жасайды. Қажетті жабдықтар мен жұмыс орындарын кәсіпкерлер ұсынған. Прокуратура мәліметінше, бірнеше тігін машинасын Мырзахметов жеке қаражатына сатып алған. Қазір ол басқа сотталғандармен бірге қап тігумен айналысып жүр.
Еске салайық, Аблай Мырзахметов аса ірі көлемдегі алаяқтық үшін кінәлі деп танылып, бес жылға бас бостандығынан айырылған болатын. Сондай-ақ ол кәсіпкерді туысын қылмыстық жауапкершіліктен босатуға көмектесемін деп пара беруге итермеледі деген айыппен сотталған.
2025 жылдың қаңтарында Мырзахметов жазасының қалған бөлігін бостандығын шектеу жазасына ауыстыруды сұрап өтініш білдірген, алайда сот бұл өтінішті қанағаттандырмады. Себебі, марапат саны жеткіліксіз болған – сотьяның айтуынша, оның тек бір ғана ынталандыру жазбасы болған, ол да – адал еңбек үшін, ал бұл заң бойынша оның міндеті саналады.
Аблай Мырзахметов туралы не белгілі?
Аблай Мырзахметов 2013 жылдан бастап "Атамекен" ҰКП төрағасы қызметін атқарды. Бұған дейін, 2007 жылдан бастап "Атамекен" Қазақстан ұлттық экономикалық палатасы" заңды тұлғалар бірлестігінің басқарма төрағасы болған. 2022 жылдың ақпанында ол өз еркімен қызметінен кеткен.
2002 жылы Мырзахметов Қазақстан Республикасының Көлік және коммуникация министрі қызметін атқарды. Кейін ол сыбайлас жемқорлық күдігіне байланысты қызметінен босатылды. 2003 жылы шартты түрде 5 жылға бас бостандығынан айырылған.
Instagram парақшамызға жазылып, ең қызықты ақпараттарды бірінші болып оқыңыз!
