Соғымыңыз шүйгін болсын! Жаңа жыл алдында қалада да, далада да сауда қызған. Базар, дүкендердің сөрелері де төрт түліктің етіне сықа толып тұр. Әрине қысты орталап қалған бұл кезде жылқы етіне сұраныс жоғары.
Енді базардың нарқы қандай? Ел-жұрт, қасапшылар не деп жатыр?
Өңірде соғым маусымы желтоқсанның басында басталады. Калалықтардың дені соғымды ауылдан тасиды. Ал енді бірі қаладағы ет дүкендерінен алады. Базардағы баға құбылып тұрады. «Себебі делдал көп. Әзірге еттің бағасы тұрақты», — дейді тұрғындар.
Нұрғазы Арынов, қала тұрғыны:
- Жаңа жылға ет алып жатырмыз. Үнемі осы жерден аламыз. Еті жақсы. Қымбаттады деп айта алмаймыз. Сол баға шығып тұр алып жүрген.
Александр Алешко, қала тұрғыны:
- Менің базардан алатын себебім мұнда сіз етті қарап, тексеріп ала аласыз. Жылқының бір келі сүр етін алдым. Шамамен үш мың теңге шықты. Бағасы мен үшін өте қолайлы.
Базардағы еттің бағасы сапасын қарай әртүрлі. Негізінен үш жарым мен төрт мыңның аралығында.
Алма Мәкішов, сатушы:
- Еттің бағасы сапасына қарай. Жоғарғы сападағы ет 3800 теңгеден тұрады. Ет жақсы. Жас малдардың еттері.
Білікті қасапшы Еркін Әбдірахманов етті шаруалардан тікелей көтерме бағада сатып алған әлдеқайда тиімді дейді. Ала жаздай байлап, семірткен жылқыларын қыс қылаң бергенде шетінен жыға бастайды.
Еркін Әбдірахманов, қасапшы:
- Биылғы тайдың сирағы 130 мыңнан бастап 150 мыңға дейін болып жатыр. Тұтас алса 550 мыңға дейін барып жатыр. Ал байталдардың сирағы 180 мың, тұтас алса 750 мыңға дейін барып жатыр. Баға қатты қымбат емес. Сирақтап алған қазақы ерекше, пайдалы.
Бағаны тұрақтандыруға жауапты тиісті басқарма өкілдері қадағалаумен ғана шектеледі. Мәселен, өңірде жыл басынан бері барлық ет түрі 15 пайызға қымбаттаған.
Азамат Ситуаров, облыстық Ауыл шаруашылығы басқармасының бөлім жетекшісі:
- Мемлекеттік органдар еттің бағасын тек қадағалап қана отырады. Ал баға нарыққа қарай құбылады. Біз бағаны тұрақтандыру мақсатында ауыл шаруашылығы жәрмеңкелерін өткіземіз. Ондағы өнім нарықтағыдан 15-20 пайызға төмен сатылады. Жалпы биыл өңірде 178 мың тонна ет өндірілді.
Жалпы ет дегенде елорда халқы да Ақмола облысының шаруаларына иек артады. Сондықтан бағаны ұстап тұру маңызды. Ал өңірде соғым науқаны қаңтар айының соңына дейін жалғасады.
Авторлары: Абзал Азаматұлы, Евгений Шинкаренко
