Су ресурстары және ирригация министрі Нұржан Нұржігітов Жетісу облысына жұмыс сапары кезінде су шаруашылығы нысандарының жай-жапсарымен және бірқатар ірі жобаның іске асу барысымен танысты , деп жазады Egemen.kz.
Ведомство басшысы Көксу ауданында Ислам даму банкінің қолдауымен жүзеге асырылып жатқан ирригациялық және дренаждық жүйелерді реконструкциялау жобасын тексерді, бірінші кезең бойынша жөнделіп жатқан 108,7 шақырымдық 9 канал 2026 жылы аяқталады.
Ақсу ауданында каналдарды бетондау жұмыстарының 75 пайызы орындалған толық аяқтау келесі жылға жоспарланған, нәтижесінде 11 мың гектар жерге тұрақты су жеткізіледі. Биыл қыркүйек айында Ақсу ауданында күрделі реконструкциядан кейін Қызылағаш су қоймасы пайдалануға берілді. Қазіргі уақытта министрліктің Су шаруашылығы комитеті Қызылағаш массивін салу жобасын жүзеге асырып жатыр. Бұл жоба Ақсу ауданындағы суармалы жер көлемін 4 500 гектарға арттыруға мүмкіндік береді.
Н.Нұржігітов жұмыстарды белгіленген мерзімде аяқтауды тапсырып, жобалардың суармалы жерлердің көлемін көбейтуге бағытталғанын атап өтті.
«Барлық жұмыс кестеге сай жүріп жатыр және уақытында аяқталуы керек. Біздің министрлік ауқымды жобаларды жүзеге асыру үшін инвестициялар мен гранттық қаражатты белсенді тартып отыр. Енді осы бастамаларды соңына дейін жеткізу қажет. Аграрлық секторды сапалы әрі уақытылы сумен қамтамасыз ету – біздің басты міндеттеріміздің бірі», деді министр.
