Жаңа 2025-2026 оқу жылы қарсаңында Жетісу облысында бірқатар білім нысандары пайдалануға берілді. «Келешек мектебі» жобасы аясында Алакөл ауданы Достық ауылында 600 орындық, Панфилов ауданы Лесновка ауылында 300 орындық жаңа мектеп ашылды . Жыл соңына дейін Ақсу мен Кербұлақ аудандарында тағы екі мектеп қолданысқа беріледі. Сонымен бірге өңірде сегіз білім нысаны күрделі жөндеуден өтуде, оның алтауы биыл аяқталады, деп хабарлайды Egemen.kz.
Облыстық білім басқармасының мәліметінше, жаңа оқу жылына дайындық барысында жылу маусымына қажетті отын жеткізіліп, мектептердің материалдық-техникалық базасы нығайтылған. Жыл соңына дейін 58 мектептің спорт залы мен асханасы жаңарып, 70 пән кабинеті сатып алынады.
Биыл әлеуметтік қолдау шараларына да ерекше мән берілуде. 25 мыңнан астам әлеуметтік жағдайы төмен отбасы балаларына мектеп формасы мен кеңсе тауарларын алуға 1,1 млрд теңге бөлініп, қаржы ата-аналардың есепшоттарына аударылды. Сондай-ақ бастауыш және әлеуметтік осал отбасы балалары тегін ыстық тамақпен қамтылады.
Оқушылардың қауіпсіздігін қамтамасыз ету үшін биыл облысқа қосымша сегіз автобус алынған. Қазіргі таңда 87 елді мекеннен 2 мыңнан астам бала мектепке тасымалданады.
Жаңа оқу жылында Жетісу облысында оқушылар саны 131 мыңнан асса, оның ішінде 13 мыңнан астамы бірінші сыныпқа барады. Ал облыс колледждеріне 4,5 мың студент қабылданады.
