Жетісу облысында алты автоматты газ тарату станциясы салынып жатыр .
Олар "Талдықорған-Үшарал" магистральдық газ құбыры бойында орналасады. Инвестициялық жобаны іске асыру аясындағы жұмыстардың барысымен "Интергаз Орталық Азия" АҚ Бас директоры Манас Тасыбаев танысты.
Алты автоматты газ тарату станциясы «Талдықорған-Үшарал» магистральдық құбырының барлық 302 шақырымы бойында бір мезгілде салынып жатыр. Мәселен, бұл Сарқан мен Үшарал қалалары, Қапал, Жансүгіров, Қойлық және Қабанбай ауылдары. Олардың әрқайсысының дайындығын "Интергаз Орталық Азия" АҚ Бас директоры Манас Тасыбаев тексерді. Компания басшылығының айтуынша, жұмыс қарқыны жоғары.
Руслан Сүйіндіков, "Интергаз Орталық Азия" АҚ Алматы магистральдық газ құбырлары басқармасы филиалының директоры:
- Қазіргі таңда 6 станцияда жұмыс жүргізілуде. Осы уақытқа 70-75 пайызға жұмыстардың біту деңгейінде тұр. Магистарлды газ құбыры жақын арада толық сынақ жұмыстарынан өтті.
Алматы облысы бөлінгеннен кейін жаңадан құрылған Жетісу өңірінде көгілдір отынды бес елді мекен ғана пайдаланған. Бүгінде бұл сан 84-ке жетті. Осы жылдың соңына дейін 126 ауылдың тұрғыны табиғи газды тұтынатын болады. Автоматты газ тарату станцияларын іске қосу өңірді газдандырудың ауқымды жобасының екінші кезеңі болады.
Айдос Бекетаев, Жетісу облысы энергетика және ТҮКШ басқармасының басшысы:
- Тұрғындарымызға жеңілдік болу үшін бізде 170-180 мың теңгені құрайды, осы бағаны облыс бойынша ұстап отырмыз және де пешті, қазандықты тұрғындардың өздері алады. Кімнің шамасы жоқ бірден алуға бөліп төлеуге мүмкіншілік береді он айға дейін.
Бүгінде «Талдықорған-Үшарал» магистральдық газ құбырының сапасын сынау бойынша барлық жұмыстар аяқталды. Ол ағымдағы жылдың тамыз айында пайдалануға беріледі. Содан кейін облыстың тағы 66 елді мекені табиғи газды пайдаланатын болады.
Достық Талғатұлы, Олжас Байбосынов
