Абай облысының мектептерінде биометриялық бақылау жүйесі енгізілуде .

Оқушылар мен мұғалімдер мектепке арнайы бет-әлпетті тану жүйесі арқылы кіріп-шығады. Бұл жүйе арқылы бала мектепке келген сәтте ата-анасының телефонына бірден хабарлама жіберіледі. Жалпы Абай облысында 304 оқу ошағында 100 мыңнан астам оқушы білім алып жатыр.

Осындай биометриялық жүйелердің бірі Семей қаласындағы №51 мектепте орнатылған. Мектепке кіру үшін оқушы арнайы камераға жүзін жақындатады. Құрылғы баланың бейнесін сканерлеп, базаға енгізілген деректермен сәйкестендіреді. Егер деректер сәйкес келсе, турникет автоматты түрде ашылады.

Қайырбек Әбілқасымов, мектеп директоры:

- Балалардың қауіпсіздігіне де үлкен көңіл бөлінген. Біздің мектебіміздің кіре берісінен бастап, фейс айди қондырғылары қойылған. Оны өткен әрбір бала танылады. Содан кейін, мектепке кіргенде, асханаға барғанда, кітапханаға барғанда мектептен шыққанда балалардың келгені және кеткені жөнінде ата-аналарына, мұғалімдеріне хабарлама келіп тұрады.

6-сыныпта оқитын Зере Сайлаубаева роботтармен жұмыс істегенді жақсы көреді. Оларды бағдарламалап, тәжірибеден өткізеді. Дарынды оқушы осы бағытта халықаралық жарыстарға қатысып, қызығушылығын одан әрі жетілдіруді көздейді.

Зере Сайлаубаева, оқушы:

- Әсіресе маған робототехника пәні ұнайды. Онда біз роботтар құраймыз, сол роботтарды біз ұшырамыз, жүргіземіз, зерттейміз. Болашақта жарыстарға қатысқым келеді.

Еділ Әділғазы, информатика пәнінің мұғалімі:

- Халықаралық жарыстар бар фөст бағытында. Сол жерде 10-11-сынып оқушылар жақсы нәтиже көрсететін болса бүкіл Қазақстан бойынша гранттар ұтып алуға мүмкіндіктері бар. Осы роботтарды құрастырып оларды ары қарай дамытып, жасанды интелекті қосып математика, биология сияқты барлық пәндерді қосып жоба жасап та қатысуға болады.

Цифрлық технологиялар бәріне қолжетімді болуы үшін өңірдегі барлық мектептер сапалы интернетпен қамтылған. Шалғайда жатқан ауылдардағы 135 білім ордасына Starlink спутниктік орнатылған.Нәтижесінде барлық білім беру ұйымдарында жаңа цифрлық платформалар қолданылып жатыр.

Әлфия Нығматуллина, облыстық инновациялық әдістемелік орталық директорының орынбасары:

- Біздің мектептеріміз Bilimclass жүйесімен екінші жыл қатарынан жұмыс істеп келеді. Бұл отандық өнім, ол арқылы ата-ана мобильді қосымша немесе браузер арқылы баласының үлгерімін, үй тапсырмаларын көре алады. Бұл мектеп ұжымы, ата-ана және оқушы арасында тиімді кері байланыс орнатуға мүмкіндік береді.

Абай облысында Astana Hub халықаралық технопаркімен бірлескен жоба іске асуда. Оның аясында жоғары сынып оқушылары бағдарламалау негіздерін меңгереді. Осы арқылы ұстаздар мектеп оқушыларының заманауи технологияларды тиімді қолдануына жол ашып отыр.

Рүстем Қайратұлы, Берік Жобалайұлы