Англия мен Уэльстегі аптап ыстық жүздеген жанның өмірін қиюы мүмкін. Себебі, қолайсыз ауа райы созылмалы дерті бар науқастарға кері әсер етіп отыр. Соңғы 4 жылда Еуропада ыстықтың кесірінен 10 мыңнан астам адам көз жұмған.
Климаттық дағдарыс ауа температурасының әдеттегіден 2-4 градусқа көтерілуіне ықпал етіп отыр. Биыл Англия мен Уэльсте ең көп кісі өлімі тіркеледі деген қауіп бар. Әсіресе, Лондон халқы сақтануы керек.
Денсаулық сақтау қауіпсіздігі агенттігінің деректеріне сәйкес, 2020-2024 жылдар аралығында аптаптан 10 мыңнан астам адам мезгілсіз көз жұмған. Мамандар үкіметтің климаттық дағдарысқа дайындығын жеткіліксіз және жүйесіз деп сынға алды.
Кирсти Маккейб, Патшалық метеорологиялық қоғамның қызметкері:
Болашақта мұндай жағдайлардың жиі қайталануы әбден мүмкін. Алдағы 12 жылдың ішінде ауа температурасының 40 градусқа көтерілу ықтималдылығы елу де елу.
Ресми құжаттарда өлім себебі ретінде аптап ыстық сирек көрсетіледі. Себебі мұндай күн райы көбіне жүрек, өкпе, бүйрек ауруларын асқындырып, жанама түрде әсер етеді. Болжам бойынша, ғасыр соңына қарай Еуропада жыл сайын 8 мыңнан 80 мыңға дейін адам ыстыққа шыдас бермей, бақилық болуы мүмкін.
Эрих Фишер, климаттанушы ғалым:
Атмосфера мен мұхиттардың жылынуы күннің қатты ысуы, нөсер, дауыл сияқты төтенше құбылыстардың жиілеуіне себеп болуда. Аптап ыстық зиянын бұрынғыдан да қатты тигізіп жатыр.
Мәселені шешудің басты жолы – қоршаған ортаны ластайтын қазба отындарын жағуды азайту. Ормандар мен батпақты жерлерді сақтау да маңызды, дейді ғалымдар.
Марина Бекенова
