Tatler Best байқауы алғаш рет Қазақстанды үздік топтамаға қосып, еліміздің гастрономия мен қонақ үй саласындағы деңгейін жоғары бағалады.
Қазақстан алғаш рет Азия-Тынық мұхиты аймағындағы беделді "ASIA-PACIFIC-Best 100 & Best-in-Class" рейтингінің тізіміне кірді. Бірден үш қазақстандық мекеме – елордалық The Veil бутик – қонақүйі, Алматыдағы Auyl мейрамханасы және French 42 бар – үздік ретінде танылды, деп хабарлайды inbusiness.kz сайты.
Kazakh Tourism компаниясының хабарлауынша, Бангкокте өткен Tatler Best 2025 байқауынығ нәтижелері жарияланды. Мекемелер саланың жетекші халықаралық өкілдерімен қатар бағаланып, ұлттық бірегейлік пен заманауи стандарттарды сәтті үйлестіргені үшін лайық деп танылды.
– Қазақстан халықаралық аренада өз позициясын нығайтып, қонақжайлылықтың өзіндік стилін дамытуда. Халықаралық мойындау – бұл отандық қонақжайлылық және гастрономия индустриясы өкілдерінің мақсатты жұмысының нәтижесі. Олар заманауи стандарттар мен ұлттық бірегейлікті сәтті ұштастырып отыр-, деп атап өтті "Kazakh Tourism" ұлттық компаниясы" АҚ басқарма төрағасының міндетін атқарушы Даниел Сержанұлы.
Tatler Best лауреаттарын іріктеу бірнеше кезеңнен тұрады. Бағалау процесіне бүкіл аймақтан 700-ден астам қонақ үй сарапшылары, Tatler редакциясы, танымал аспаздық сыншылар, халықаралық журналистер мен кәсіби мамандар қатысады. Әсіресе гастрономия саласындағы ықпалды халықаралық сарапшылардың бағасы ескеріледі.
