Батыс Қазақстан облысында мектеп-балабақшаға балалар тамағын тасымалдаушы кәсіпкерлер ет-майдың қымбаттағанын айтып, мемлекеттік қолдауды ұлғайтуды сұрап отыр. Білім басқармасының өкілі «келісімшарттағы баға өзгермейді» деп кесіп айтты. Бірақ кәсіпкерлер заңға сүйеніп, мәселенің ретін табар деген үмітпен облыс әкімінің қабылдауына барды.
Қала мен аудан-ауылдағы білім беру ұйымдарына азық-түлік жеткізетін кәсіпкерлер бес айдан бері әр мекеменің табалдырығын тоздырып жүр. Айтуларынша, нарықта ет, май бағасы күрт өскен. Ал мектеп-балабақшалармен жасалған келісімшарттағы баға едәуір төмен. Шығын шаш-етектен.
Назгүл Жақанова, кәсіпкер:
Біз барлық тағам бойынша қазіргі таңда шығынға ұшырап отырмыз. Апарған тамағымыздың ақшасын ақтап отырған жоқпыз. 2300 теңгеден ет жоқ қазір. Біз 2500-2600 теңгеден алып отырмыз. Ал біздің келісімшарттағы баға — 2100 теңге боп қалып отыр.
Назгүл Жұмағұлова, кәсіпкер:
Сары майды балабақшаларға 553 теңгеден апарып отырмын. Бірақ өзім 180 граммдық кішісін 1200 теңгеге сатып аламын. Күніне 100 дана майды 120 мың теңгеге аламын. Ал 53 мыңға апарамын. Сонда мен екі есеге шығындалып отырмын.
Білім басқармасы өкілінің айтуынша, қолданыстағы заңға сай жыл басында жасасқан келісімшарт талабын өзгертуге негіз жоқ.
Самиғолла Закарияұлы, облыстық Білім басқармасының бөлім басшысы:
Тауарлардың қымбаттауы мәселесіне келетін болсақ, бүгінгі күнге келісімшарт жасасты. Екі жақ та тапсырыс беруші, өнім беруші қол қойды. Сондықтан да келісімшартты өзгертуге ешқандай мүмкіндік жоқ. Келісімшартқа қол қойылғаннан кейін екі тарап та өз міндеттемелерін толық орындауы керек.
Дегенмен, кәсіпкерлер «Мемлекеттік сатып алу», «Сауданы реттеу туралы» заңдар мен Үкімет, Ұлттық банк, Оқу-ағарту министрлігінің қаулыларына сүйене, мәселені шешуге боларын алға тартады. Осы уәждерімен олар кәсіпкерлер палатасына жүгініп, облыс әкімінің қабылдауына барды.
Мирлан Жұмағалиев, шаруа қожалығының менеджері:
Бюджетті үнемдеуге байланысты екенін айтуда. Алайда біз бюджеттен емес, баладан үнемдеп отырмыз. Ондай тәжірибе бар, бағаны көтеру деген. Қосымша келісімшарт жасап, бағаны инфляцияға байланысты реттеуді сұрап отырмыз.
Ет бағасын білмекке тауар тасымалдаушылар азық-түлік алатын базарға бардық. Шынымен, баға шарықтап кеткен.
Алмагүл Сисенова, ет сатушы:
Иә, ет қымбаттады. Қазір етті 2600 теңгеден алып жатырмыз. Келісін 2700-2800 теңгеден сатып жатырмыз. 4000-ға дейін барады. Бірақ оны екінің бірі ала алмайды.
Ал шаруалар ет бағасының өскені дұрыс деп санайды. Өйткені мал бағу оңай емес.
Нұрболат Әдиетов, шаруа қожалығының басшысы:
Мен өзім де осы бағаны қарап жүргем. Ауылды сақтап қалу үшін мал еті бағасының көтерілгені дұрыс. Көзге былай қымбат көрінгенімен, әлде де аз деп ойлаймын. Шегірткесі бар, киігі бар. Адамдарға, шаруа қожалықтарына өте қиын боп жатыр.
Ауыл шаруашылығы басқармасы тұрақтандыру қорлары арқылы арзан етті жәрмеңкелерге шығарып қана бағаны реттей алады.
Миржан Маутов, облыстық Ауыл шаруашылығы басқармасының бөлім басшысы:
Жыл басынан ет бағасының қымбаттауы байқалады. Негізгі факторлар экспорттың ашылуы, жанар-жағармай, техникалардың, мал бағуға қажетті жабдықтардың қымбаттауы себеп болуда. Қазір баға тұрақталды.
Ал облыс әкімі Нариман Төреғалиев кәсіпкерлер мәселесін заңгерлермен кеңесіп, тағы бір зерделеп көруді тапсырды. Әзірге тасымалдаушылар талабы ашық күйінде қалып отыр.
Ардақ Мұратқызы
