Ертең футболдан Қазақстан құрамасы 2026 жылғы Әлем чемпионатына іріктеу аясында Уэльспен кездеседі. Бүгін Астана-Аренда да матч алдындағы баспасөз мәслихаты өтті. Онда қорғаушы Нұралы Әліп ұлттық құраманың келесі капитаны болуға дайынмын деді. Себебі, осы күнге дейін ол міндетті атқарған Асхат Тағыберген құрамадағы мансабын аяқтаған еді. Ал бас бапкер Әли Әлиев журналистердің сұрақтарына жауап беріп, ертеңгі ойынға жүз пайыз дайын деген спортшылар ғана алаңға шығатынын айтты. Олардың арасында Абат Айымбетов болмайды. Оның дәл қазіргі жаттығуы мен тәжірибесі аз болып тұрғандықтан бапкер шақырту жасамаған. Ал Қайрат пен Селтик ойынында шеберлігін көрсеткен Темірлан Анарбеков ертеңгі матчта қақпаға тұра ма? Бапкердің жауабы мынадай.
Әли Әлиев, Футболдан Қазақстан ұлттық құрамасының бас бапкері:
Алдымен спортшының медициналық тексерістен қалай өткені мен нәтижесіне назар аударамыз. «Оқжетпеспен» өткен ойында Темірлан Анарбековтың тізесіне Дамир Марат соқтығысып, сол себепті ол 2-3 күн жаттығуға қатысқан жоқ. Медициналық штаб қорытындысын берген соң ғана шешім қабылданады. Жалпы, Қазақстанда қазір мықты қақпашылар шоғыры қалыптасқан. Бұл — бес жыл бұрын дұрыс шешім қабылданып, сапалы құрам жасақталуының нәтижесі.
Азамат Бейбітұлы
