Құрлықтық хоккей лигасының (ҚХЛ) кезекті турында Шығыс конференциясының соңғы орындарында келе жатқан қос команда күш сынасты, деп жазады Egemen.kz.
Осыған дейін «Барыс» Астанада өткен үш кездесудің үшеуінде де ұтылған еді. Атап айтсақ, «Сочиге» (1:5), «Тракторға» (0:2) және «Автомобилистке» (1:4) есе жіберді.
Бұл жолы жерлестерміз «Амурге» қарсы ойнады. Бәсеке басталған бетте ойын тізгінін қолға алған Хабаровскіден келген хоккейшілер қатарынан үш шайбаны қақпамызға тоғытты. Тек 40 минутта Әлихан Әсетовтің пасынан кейін Кирилл Панюков гол соға алды. Бірақ одан әріге елордалықтардың шамасы жетпеді. Матчтың аяқталуына бір минуттай уақыт қалғанда қонақтар тағы бір мәрте нысананы дәл көздеп, соңғы нүктені қойды. Есеп – 1:4.
Жарыс кестесіндегі жағдайын одан әрі қиындатып алған «Барыс» енді келесі кездесуін 30 желтоқсанда Омбыда жергілікті «Авангард» клубына қарсы өткізеді.
