Бүгін «Тұмар» ұлттық телевизиялық бәйгесінің жеңімпаздары анықталады.
Үміткерлер 11 номинация бойынша іріктелген. 300-ден астам жұмыстың ішінен үздік деп танылғандары арнайы сыйлыққа ие болмақ. "Қазмедиа" орталығында дәл қазір дәстүрлі доданың салтанатты марапаттау рәсімі өтіп жатыр. "Тұмардан" үміттілер кімдер?
Кәмшат Мұхамеджан, тілші:
- "Қазмедиа" алаңында бүгін дүбірлі думан. Жыл сайын журналистер қауымы асыға күтетін "ТҰМАРДЫҢ" қазір биылғы жеңімпаздары анықталады. Сағат пен санаспай, тәулікпен таласпай табанды еңбек етіп жүрген талайы тұғырдан көрінуге үмітті. Марапаттау рәсімі сағат 5-ке жоспарланған. Қазір бірер минуттардан кейін 11 аталым бойынша алғашқы жеңімпаздарды білетін боламыз. Айта кету керек, біздің арнадан қос бірдей тілшіміз үміткерлер тізіміне еніпті. "Ең үздік тележурналист" номинациясында Аслан Қаженов, "Ең үздік ақпараттық-сараптамалық бағдарламада" "President" жобасымен Әділ Балтабай бар. "Ең үздік әлеуметтік тележобада" да біз номинанттар қатарындамыз. Арна абыройын асқақтатып жүрген жігіттерге сәт тілік тілейміз.
Кәмшат Мұхамеджан, тілші:
- Таңдаулы таланттарға берілетін мәртебесі жоғары жүлде биыл осымен 8-і мәрте ұйымдастырылып отыр. Биыл байқауға 11 номинация бойынша республикалық және өңірлік телеарналардан 300-ден астам өтінім келіп түскен. Жұмыстар іріктеліп алынып, 44-і үміткерлер тізіміне еніпті. Жеңімпаздарға «Тұмар» мүсіншесі мен 1 миллион теңге көлеміндегі қаржылай сыйақы табысталады.
