Астана қаласындағы Ұлттық нейрохирургия орталығы – күн сайын адам өмірі үшін күрес жүріп жататын маңызды мекеме. Осы орталықтың ми патологиясының нейрохирургиясы бөлімін басқарушы, жоғары санатты нейрохирург Нұржан Рыскелдиев – өмір мен үміттің арасындағы нәзік жіпті жалғап жүрген білікті дәрігер. Ол талай жанды аман алып қалған, өзінің кәсіби шеберлігімен қатар адамгершілік қасиетімен де құрметке ие болған тұлға.
Арманнан шындыққа айналған мамандық
Нұржан Әмірбекұлының дәрігер болуды бала кезден армандаған. Мектеп оқушысы болып жүргенінде анасы да ұлының ақ халатты абзал жан болғанын тілеген екен. Анасының сол үмітін ақтаған ұлы бүгінде еліміздің білікті нейрохирургтарының біріне айналды.
Ұлттық нейрохирургия орталығынан
Қазір ол бас миының күрделі патологияларына ота жасауға маманданған жоғары санатты дәрігер. Әсіресе, үлкен ісіктерді алып тастау секілді жоғары деңгейдегі нейрохирургиялық операцияларды сәтті орындайды. Дәрігердің тәжірибесінде жүкті әйелдерге жасалған аса күрделі оталар арқылы ана мен баланың өмірін аман алып қалған ерекше оқиғалар да бар.
Бақыт деген – баласын бауырына басқан ана
Нұржан Рыскелдиев үшін ең үлкен қуаныш – емделіп шыққан науқастың өз аяғымен отбасына оралуы. Бұл – оның мамандығына деген адалдығын арттыра түсетін, жүрекке қуаныш ұялататын сәттер.
Ұлттық нейрохирургия орталығынан
Жуырда дәрігердің қабылдауына Алматы қаласынан бұрынғы емделушісі келген. Осыдан екі жыл бұрын ол жүктіліктің 28-аптасында шұғыл түрде орталыққа жеткізіліп, мидың сол жақ маңдай-самай төбе бөлігінде орналасқан үлкен ісік диагнозымен Нұржан Әмірбекұлына қаралған болатын. Сол сәтте өмір мен өлім таразыға түсті. Алайда нейрохирург микрохирургиялық әдіспен сәтті ота жасап, ана мен баланы аман алып қалды. Қазір сол сәби екі жасқа толуға жақын, анасы да, өзі де аман-есен.
Жанымен емдейтін дәрігер
Нұржан Әмірбекұлы – тек кәсіби біліктілігі жоғары маман ғана емес, әр пациентке ерекше ілтипатпен қарайтын жан. Ол үшін дәрігер болу – жай ғана мамандық емес, адамға үміт пен өмір сыйлайтын қасиетті миссия.
Ұлттық нейрохирургия орталығынан
Медицина қызметкерлері күні қарсаңында осындай жанкешті еңбек етіп жүрген ақ халатты абзал жандарды құрметтеу – баршамыз үшін парыз. Бұл материал – Нұржан Әмірбекұлы сынды жанашыр дәрігерлердің қоғамдағы рөлін, адам өміріне тигізетін ықпалын көрсетуге арналған бір үзік сыр.
Айта кетейік, бұған дейін Ұлттық нейрохирургия орталығында күрделі ми ісігі сәтті алынғанын жазған едік.
