Қаржылық мониторинг агенттігінің Абай облысы бойынша департаменті " Rakhat0425 " қаржы пирамидасының қызметін тоқтатты, деп хабарлайды ведомствоның баспасөз қызметі.
Қаржылық мониторинг агенттігінің Telegam-дағы арнасының хабарлауынша, ұйымдастырушылар азаматтардан қаражат тартып, мемлекеттік сатып алуға қатысты жалған инвестициялық жобадан 30 пайыз дивиденд уәде еткен.
"Нәтижесінде 350 адамнан 790 млн теңгеден астам қаражат жиналған. Сонымен қатар күдіктілер азаматтарды пәтерлерін төмен бағамен беруге көндіріп, кейін оларды үшінші тұлғалардың атына рәсімдеген.
Бұл мүлік "инвестициялық жарна" ретінде бағаланған", — дейді агенттік өкілдері.
Қазіргі уақытта екі күдікті қамауға алынып, үшіншісіне үйқамақ түріндегі бұлтартпау шарасы қолданылды.
Қылмыстық-процесстік кодекстің 201-бабына сәйкес, агенттік өкілдері өзге ақпаратты жария етпей отыр.
Агенттіктегілер қаржы пирамидаларының белгілерін тексеруге мүмкіндік беретін "Baiqa, piramida!" Telegram-боты жұмыс істейтінін еске салады.
Құзырлы орган өкілдері қаржы пирамидасының әрекетіне тап болған қазақстандықтарға тұрғылықты жер бойынша Экономикалық тергеп-тексеру департаментіне жүгінуді сұрайды.
