Қостанай облысы Әулиекөл ауданында спорттық-сауықтыру кешені және қайта жаңғыртылған балабақша пайдалануға берілді, деп хабарлайды 24KZ. Оның бірі Новонежин, екіншісі Аманқарағай ауылында орналасқан. Ел игілігіне тапсырылған қос ғимарат замануи құрал-жабдықтармен қамтылған.
Новонежин ауылында бой көтерген спорттық-сауықтыру кешенінің аумағы 1600 шаршы метр. Мұнда футбол, волейбол, баскетбол ойнауға арналған әмбебеп залдармен қатар тоғызқұмалақ, асық ату, қазақ күресі сияқты ұлттық спорт түрлеріне арналған жеке бөлмелер бар. Осы кешенді салуға облыстық бюджеттен 795 миллион теңге бөлінген.
Құмар Ақсақалов, облыс әкімі:
- Екі жылдың ішінде облыс бойынша бізде 18 ірі спорт нысандары ашылды. Соның ішінде 14 осындай спорт сауықтыру кешендері. Тағы да 3 спорт кешенінің құрылысы осы жылдың аяғына дейін бітуге тиісті. Бұл жұмыс міндетті түрде жалғасын табады.
Новонежин ауылындағы көптен қараусыз қалған шағын бақ биыл дұрысталып, рет келтірілді. Бұл іске жергілікті кәсіпкерлер мұрындық болды.
Айтмұханбет Оспанов, Новонежин ауылының тұрғыны:
- ТОО басшылары, шаруа басшылары – бәрі әкіммен тығыз байланыста болып, осындай Новонежин тұрғындарына демалыс алаңын ашып беріп жатыр. Осы кісілерге ауыл тұрғындары атынан рақмет айтамын.
Ал Аманқарағай ауылында 145 орынға шақталған балабақша бастан-аяқ жөнделіп, қайта жаңғыртылды. Мұнда бүлдіршіндердің жан-жақты дамуына барлық жағдай жасалған. Ойын, жатын бөлмелері, музыка залы, асхана, ашық ойын алаңдардары керек-жарақтармен толық жабдықталған. Жалпы Аманқарағайда соңғы бір-екі жылда бірнеше әлеуметтік нысан жөнделіп, қалпына келтірілді.
Айнұр Әбілжанова, Аманқарағай ауылының тұрғыны:
- Бұл жалғыз емес. Яғни былтыр ғана бізде денсаулық сақтау нысаны іске қосылды. Одан кейін дене шынықтыру кешені ашылды. Жанымызда мынау үлкен мәдениет үйі күрделі жөндеуден өтіп жатыр.
Айта кетелік, Аманқарағайдағы «Айналайын» балабақшасын қайта жаңғыртуға бюджеттен 586 миллион теңге жұмсалған.
Авторлары: Мағауия Қалиев, Ермек Мұхамедияров