Түркістан облысында жыл басынан бері 30 адам суға кетті .

Қаза болғандардың 13-і бала. Оның ішінде 2 жасөспірім рұқсат етілмеген жерге суға түскен. Қайғылы жағдайдың алдын алу үшін жергілікті төтеншеліктер су айдындарындағы қауіпсіздікті күшейте түсті. Каналдар мен көлдердің жағалауын тексеріп, рұқсат етілмеген жерде шомылғандарға айыппұл сала бастады.

Бұл Кентау қаласына қарасты Хантағы өзенінің бойы. Бұл аумағында шомылуға тыйым салынған. Бірақ соған қарамастан ата-ананың қадағалауынсыз жүрген балалар суға түсуге келіпті. Тәртіп сақшыларды жасөспірімдерді полиция бөлімшесіне жеткізді. Ата-аналарына хабарлап, әкімшілік хаттама рәсімдеді. Ескертуді елемегендерге әкімшілік жаза қолданылады.

Оразкелді Дүйсен, облыстық ТЖД Азаматтық қорғаныс басқармасының бастығы:

- Қазіргі таңда полиция қызметкерлерімен бірлесе отырып, жыл басына бері жүргізілген рейдтерге қарай, 56 жеке тұлғаға 729 мың теңге айыппұл салынды. Бұл бағыттағы жұмыстар қарқынды жүруде. Ата-аналардың чаттарына судағы қауіпсіздік бейнероликтері әзірленіп, барлығына жіберілуде.

Жазы ыстық өңірде суға шомылуға рұқсат етілген орындар аз. Өткен жылы осындай 27 орын мен 14 жағажай белгіленсе, биыл облыс әкімінің қаулысымен оның санын 70-ке жеткізу көзделіп отыр. Бірақ соған қарамастан қауіпсіздік шараларын сақтамай, суға мас күйінде түсетіндер көп.

Жауапты министрлік өкілдерінің мәліметінше, елімізде 600-ден астам рұқсат етілген және шомылуға тыйым салынған 500-ге жуық су айдыны бар. Ал ажалы судан болғандардың статистика көңіл көншітпейді. Соңғы 4 жылда еліміз бойынша 843 адам суға батып кеткен, оның 260-ы бала. Ал Түркістан облысында өткен шомылу маусымында қауіпсіздікті сақтамаған 16 адам суға кеткен. Оның 5-і бала.

Асқар Бидоллаұлы, жедел құтқару жасағының аға құтқарушысы:

- Жасөспірім балалар судың тереңдігіне де қарамай, судың ұзақтығына да қарамай жүзіп кете береді. Ал жүзіп кете бергеннен кейін, өзінің өкпесінің ауа қысымы тарланған сайын артқа қайтуға шамасы-мұршасы келмей, суға бата бастайды. Ал одан да кішкентай балалар ата-ананың қараусыздығынан суға батып кетіп жатқаны болады.

Өңірде шомылу кезеңі 1 маусымнан басталады. Бірақ соған қарамастан өзен жағалап, суға түсіп жатқандар жетерлік. Сондықтан мамандар рейдтік шараларды одан әрі күшейтуде. Жағажайларда кезекшілік ұйымдастырылып, рұқсат етілмеген жерлер жіті бақылауға алған.

Жандос Жұмабек, Ерболат Әбіш