Осы жылдың жазында Қостанай қаласының тұрғыны консультативтік-диагностикалық және дерматокосметологиялық қызмет үшін салонға 1,2 млн теңге төлеген. Алайда уәде етілген нәтижені көрмегендіктен келісімді бұзып, салоннан ақшаны қайтаруды талап еткен. Салон тұтынушының талабын ескерусіз қалдырғаннан кейін, қостанайлық тұрғын Тұтынушылар құқығын қорғау және сауда департаментіне жүгінген, деп жазады Egemen.kz.
Департамент тексеру барысында салонның өтінішке жауап бермегенін анықтап, әкімшілік жауапкершілікке тартты. Сонымен қатар келісімшартқа тұтынушылардың құқығын шектейтін шарттарды, оның ішінде ақшаны қайтармау туралы ережені алып тастау жөнінде нұсқама берілді. Ал тұтынушыға сотқа жүгіну ұсынылған.
Сот барысында салонның дерматокосметологиялық процедураларды лицензиясыз жасағаны анықталды. Себебі бұл жұмыс медициналық қызметтер қатарында болған. Сот салонды тұтынушыға барлық төленген соманы қайтаруға міндеттеді.
«Бұл жағдай кәсіпкердің заң талаптарын орындауы міндетті екенін, ал тұтынушы сапалы әрі қауіпсіз қызмет алу құқығына ие екенін тағы бір рет көрсетті. Департамент өңір тұрғындарының құқықтарын тұрақты қорғап, бақылауды күшейтеді», деді Костанай облысы бойынша сауда және тұтынушылар құқығын қорғау департаменті басшысының міндетін атқарушы К. Акижанов.
Биыл департаментке 717 – жазбаша, Telegram-ботқа – 106, «жылдам желіге» телефон арқылы – 269 өтініш түскен. Тағы 360 азамат жеке қабылдауда мамандардан кеңес алған. Тұтынушыларға департаменттің араласуымен жалпы көлемі 62,7 млн теңгеден астам қаражат қайтарылған.
Сондай-ақ мемлекеттік бақылау аясында 73 тексеру жүргізілген. Жоспардан тыс тексерулер нәтижесінде 16 кәсіпкерге ескерту беріліп, 44 кәсіпкерге жалпы сомасы 1 397 000 теңге айыппұл салынған.
