Мемлекет басшысының ауылда медициналық қызметтердің қолжетімділігін арттыру және әлеуметтік маңызы бар инфрақұрылымды дамыту жөніндегі тапсырмасына сәйкес, Жетісу облысында алғашқы медициналық-санитариялық көмек көрсететін ФАП, медициналық пункттер және дәрігерлік амбулатория ел игілігіне тапсырылды, деп жазады Egemen.kz.
Медициналық нысанның барлығы елге қайтарылған активтер қаражаты есебінен салынған.
Үкімет осы мақсатқа Арнаулы мемлекеттік қордан 1,7 млрд теңге бөлген.
Жаңа денсаулық сақтау нысандары аймақтағы Жалғызағаш және Қайнарлы (Ескелді ауданы) — Сарытөбе (Панфилов ауданы) — Жаңалық (Ақсу ауданы) — Қаратал (Көксу ауданы) — Оян (Қаратал ауданы) ауылдарында іске қосылып отыр.
Сонымен қатар Алакөл ауданы Жайпақ ауылында дәрігерлік амбулатория мен Қайнар ауылында фельдшерлік-акушерлік пункт пайдалануға берілген.
Нысандардың барлығы инженерлік инфрақұрылыммен, заманауи медициналық техникамен жабдықталған және алғашқы медициналық-санитариялық көмек көрсету стандарттарына сәйкес келеді. Бұл жобаларды жүзеге асыру шалғайдағы елді мекендердің 4 мыңнан астам тұрғынын медициналық көмекке қолжетімділікпен қамтамасыз етуге, сондай-ақ жаңа жұмыс орындарын ашуға және өңірдің денсаулық сақтау жүйесінің материалдық-техникалық базасын нығайтуға мүмкіндік береді.
