Жетісу облысының полицейлері мал ұрлаған ұрыларды қылмыс үстінде қолға түсірді. Күдіктілер түнде Ескелді ауданы Биғаш ауылынан 11 жылқыны айдап әкеткен.
Түскен арызға байланысты тәртіп сақшылары жедел іздестіру жұмыстарын жүргізді. Нәтижесінде, жергілікті шаруа қожалықтардың бірінде мал сойып жатқан үш ер адам ұсталды. Олар екі жылқыны бөлшектеп үлгерген. Пышаққа ілінбеген тоғыз бас иесіне тірідей қайтарылды. Қамауға алынғандардың екеуі бұрын да осындай ұрлық жасағаны үшін сотталған екен. Қазір олардың басқа қылмыстарға қатыстылығы тексеріліп жатыр.
Дәурен Сәкенов, облыстық ПД Криминалды полиция басқармасының бастығы:
- Жыл басынан бері қазіргі күнге дейін 100 мал ұрлығы қылмысы орын алды. Өткен жылмен салыстырғанда тұрақты. Оның ішінде 26 қылмыс ашылмай тұр. Бұл ашылмаған қылмыстар бойынша жедел іздестіру тергеу амалдары жүргізілуде. Яғни 74 қылмыс ашылып, сотқа жолданып шешім қабылданды.
