Оңтүстік Кореяда әуежай қызметкерлерінің ең ірі ереуілі өтті, деп хабарлайды 24kz.
Наразылық акциясына 15 әуежайдан мыңдаған қызметкер қатысты. Оның ішінде біздің елге ұшақтар ұшатын Инчхон айлағы бар. Ереуіл екі арадағы рейстерге қалай әсер етуі мүмкін?
Владислав Цой, тілші:
- Басты ереуіл әлемдегі ең ірі әуежайлардың бірі – Инчхон әуежайында өтіп жатыр. Бұл айлақтан Қазақстанға да күнделікті ұшақтар сапарға аттанады. Дегенмен, Астана, Алматы немесе Шымкент бағытындағы рейстердің ешқайсысы кешіктірілген жоқ. Себебі Инчхон әуежайында екі терминал бар. Ереуіл екінші терминалда өтті, ал Қазақстанға қарай рейстердің бәріне бірінші терминал қызмет көрсетеді.
Инчхон әуежайының әкімшілігі өкілдерінің айтуынша, наразылық акциясы әуежай қызметіне әсер етпеді. Себебі оған тек 700-дей қосалқы компания қызметкерлері қатысты. Олардың 500-ден астамы ғимаратты тазалаумен айналысады. Шерушілер еңбек жағдайын жақсартуды талап етіп жатыр.
Ли Ча Хён, әуежай қызметкері:
- 2007 жылдан бері әуежай корпорациясы «4 бригада – 2 ауысым» жүйесі бойынша жұмыс істейді. Мысалы, біз бүгін түнгі ауысымдамыз, таңертең жұмысты аяқтап, сол күні кешкі 6-да қайта шығуымыз керек. Бұл өте ауыр. Өндірісте өлім жағдайлары болған. Бұрын бір терминал болды, қазір екеу, бірақ жаңа қызметкерлер алынбады.
Жергілікті заң бойынша авиациялық қауіпсіздікке жауапты әуежай қызметкерлердің ереуілге қатысуға құқығы жоқ.Ереуілге шықпаған қызметкерлердің орнын толтыру үшін әуежай әкімшілігі басқа мердігер ұйымдардан 170-ке жуық адамды жұмылдырды. Инчхон халықаралық әуежайының басшылығы жолаушыларды алаңдамауға шақырып, барлық рейстерді уақытылы жүзеге асыруға күш салатынын жеткізді.
Владислав Цой, тілші:
- Ал ұйымдастырушылардың айтуынша, бүгінгі ереуіл алдын ала ескерту сипатында болды. Егер жұмыс жағдайлары өзгермесе, қазан айында шексіз ереуілге шығуы мүмкін. Дегенмен, бұл ұшақтардың кешігуіне алып келіп, қауіпсіздікке аз әсер етуі мүмкін деген қауіп бар.
Авторлары: Владислав Цой, Ольга Лян
