Сеулде Маңғыстау қолөнершілері мен дизайнерлерінің көрмесі ашылып, аймақ өнерпаздарының концерті өтті. Ақтау жұрты Сеул тұрғындарын несімен таңқалдырды?
Қазақстан шеберлерінің қолөнер бұйымдары сеулдіктерді мінсіз сапасымен тәнті етті. Көрме мен концертті Маңғыстау облысының әкімдігі мен Қазақстанның Сеулдегі елшілігі ұйымдастырды. Іс-шараның мақсаты – Оңтүстік Корея тұрғындарын қазақстандық креативті индустриямен және отандық брендтермен таныстыру.
Нұртас Сали, Маңғыстау облысының Мәдениет, тілдерді дамыту және архив ісі басқармасының басшысы:
- Креативті индустрия өкілдері қолөнершілеріміз, тігіншілеріміз, тері бұйымдарымен жұмыс жасайтын колөнершілер, зергерлер, киім тігіншілері, сонымен басқа бірнеше бағыттағы креативті индустрия өкілдері осы жерде өзінің арнайы көрмесімен келді.
Көрермендер Абыл Тарақұлы атындағы халық аспаптары оркестрін және «Жорға» би ансамблін ұзақ қол шапалақтап қарсы алды. Өнерпаздар қазақ, корей және орыс тілдерінде өнер көрсетіп, халық әуендерімен қатар классикалық туындыларды орындады, тіпті опера да қойылды.
О Ён Се, Сеул қаласының тұрғыны:
- Бүгін мен шексіз далада еркін өмір сүретін қуатты қазақ халқының рухын сезіндім. Өте әсерлі болды. Сонымен қатар музыка арқылы қазақтар мен корейлерге ортақ сезімталдық пен терең эмоцияны, жеңіл мұңды байқадым.
Концерт барысында сахнадағы алып экраннан Қазақстанның әсем табиғаты көрсетілді. Бұл көрермендерге дала кеңістігін сезінуге мүмкіндік берді. Олардың кейбірі енді Қазақстанның көрікті жерлерін өз көзімен көруге ниеттеніп отыр. Қазір елімізге ұшып келу де өте ыңғайлы — екі ел арасында төрт әуе компаниясы аптасына 20 рейс орындайды. Олар Астана, Алматы және Шымкент қалаларын Сеул және Пусанмен байланыстырады.
Авторлары: Владислав Цой, Ольга Лян
