Кейінгі жүз жылда теңіз түбінде жиналып қалған мыңдаған жарылғыш зат экологиялық ахуалға және кеме қатынасының қауіпсіздігіне елеулі қатер төндіріп келеді. Үш айға жоспарланған ауқымды миссияға Бельгия, Канада, Дания, Германия, Польша, Балтық елдері, Ұлыбритания және АҚШ-ты қоса алғанда, НАТО-ға мүше 14 мемлекет қатысады. Операцияны Бельгия Әскери-теңіз күштерінің Primula кемесі басқарады. Мамандар жарылғыш қалдықтар әсіресе, балықшылар мен кемелерге қауіп төндіріп тұрғанын айтады.
Тибо Вантурно, Бельгия әскери-теңіз күштері кемесінің командирі:
- Бірінші және Екінші дүниежүзілік соғыс кезінде теңізге тасталған жарылғыш заттар әлі күнге дейін Балтық теңізінің түбінде кемелер жиі жүретін бағыттарда жатыр. Олар су астында бүлінбей сақталған. Қауіптілігі жоғары. Бұл заттар балықшыларға да, зәкір тастаған кемелерге де үлкен қауіп төндіреді.
