Ұлыбританияда жүргізілген қоғамдық сауалнама нәтижесі тұрғындардың басым бөлігі қарулы қақтығыс жағдайында әскер қатарына қосылуға құлықсыз екенін көрсетті, деп жазады The Sunday Express басылымы.
Газет жариялаған мәліметке сәйкес, респонденттердің 64%-ы елге шабуыл жасалса да қарулы күштерге бармайтынын айтқан. Тағы 6%-ы мұндай жағдайда әскери қызметке қосылатынына күмән келтірген.
Жас топтарының барлығында әскерге барғысы келмейтіндер басым болғанымен, 18-34 жас аралығындағы азаматтардың арасында әскери қызметке баруға дайындық деңгейі жоғарырақ екені байқалды. Дегенмен сауалнамаға қанша адамның қатысқаны нақты көрсетілмеген.
Оппозициялық Консервативтік партия депутаты Марк Франсуа бұл жағдайға елдегі әскери қызметтің тартымсыздығы себеп екенін айтып, оны лейбористер үкіметінің кемшілігі ретінде сынға алды.
