Қазір Астананың 2035 жылға арналған бас жоспары әзірленіп жатыр. Оған сай Шұбар және Агро қалашықтағы тұрғын үйлер сүріледі. Сондай-ақ бірнеше ірі көше ұзартылады. Дегенмен бас қаланың бас жоспарын өзгерту қоғам талқысына салынған. Тұрғындар не дейді ? Алдағы он жылда елордада тағы қандай өзгерістер болады?
Таяуда Президент елорда мен республикалық маңызы бар қалаларды дамыту мәселесіне түзету енгізу туралы заңға қол қойды. Құжатта 11 кодекс пен 47 заңға өзгерістер енгізу көзделген. Әсіресе Астананың жасыл белдеуін сақтау, жерді дұрыс пайдалану, қалалық инфрақұрылымның қолжетімділігі мен сыртқы келбеті яғни, дизайн-кодқа бас мән бірілген. Осыған орай қазір бас қаланың 2035 жылға арналған бас жоспары әзірленіп жатыр.
Агро қалашық, Шұбар кенті және қаланың қақ ортасындағы кейбір нысандарды сүріп, орнына жаңа баспана мен әлеуметтік нысындар салынады. Дегенмен тұрғындардың пікірі ескеріледі. Сондықтан елорданың сәулет құрылысына түзетулер енгізу ісі қоғамның талқысына түсті.
Гүлдана Әбіш, «Астана бас жоспары» ҒЗЖИ» ЖШС бас маманы:
Қазіргі таңда қоғамдық талқылау өтіп жатыр. 14-шілде күні басталды. 15-шілде де 30 адам келсе, кеше 1653 сұрақпен 630 адам келді. Бүгін түске дейін 29 адам келді. Әртүрлі саябақтар салынатынына, жолдардың қалай дамитынына және ЛРТ қалай салынатыны сияқты көптеген сұрақтар қойылып жатыр. Сондай-ақ өздерінің жер телімінің тағдыры қалай болатынын да сұрап, анықтап жатыр.
Шұбар мен Агро қалашық тұрғындары үйлерінің сүрілуіне қарсы. Бүгінде қос аумақта 70 мыңнан астам адам тұрып жатыр.
Ал урбанистер Шұбар мен Агро қалашық аумағын жаңғырту керек деп есептейді. Бірі қаланың қақ ортасын, енді бірі шаһар іргесіндегі үлкен аумақты құр бос иемденіп отыр дейді.
Санжар Қазиев, урбанист:
Қазіргі таңда Шұбар қалаға ешқандай пайда әкелмейтін, керісінше салмақ түсіретін аумақ қатарына жатады. Өйткені ол шаһардың қақ ортасында орналасқан, инфрақұрылымы жан-жақты дамыған аудан. Егер сондағы тұрғын үйлерді сүріп, орнына көпқабатты үйлер, әлеуметтік нысандар мен бизнес орталықтар салынса, елорда экономикасына оң әсер етер еді. Агро қалашықтағы жағдай да тура осындай.
Елордада қазір кептеліс мәселесі де өзекті болып отыр. Сондықтан алдағы жылдары қаладағы бірнеше көше ұзартылады. Мәселен Амман көшесі Асан қайғы көшесіне қосылып, әрі қарай Бөгенбай батыр даңғылына дейін созылады. Аталған көше бойындағы үйлер де сүріледі. Одан бөлек шаһар аумағында 1 млн түп жасыл желек егіліп, 65 мың ағаш отырғызу көзделіп отыр. 138 мектеп, 181 балабақша және 115 медициналық мекеме салынады. Бұл меже 2035 жылға дейін іске асуы тиіс.
Нұрсұлтан Тілектес, тілші:
Ресми ақпаратқа сүйенсек, қала халқы жыл сайын 7 пайызға өсіп, бүгінде 1,5 млн-ға жетті. 2035 жылға дейін елордалықтар 2,5 млн-нан асады деген болжам бар. Шаһарда дәл қазір қоғамдық көлік пен баспана мәселесі өте өзекті. Астана әкімінің сөзінше, алдағы 10 жылда қоғамдық көліктің үлесін 41-ден 70 пайызға арттыру және 206 апатты үйде жанын шүберекке түйіп отырған тұрғындарды жаңа баспанамен қамту жоспарланған.
Нұрсұлтан Тілектес
