"Бағанашыл" балалар үйінің тәрбиеленушілерін Алматыдан Қонаевқа көшіру төңірегіндегі жағдайға Президент Қасым-Жомарт Тоқаев араласты, — деп хабарлайды Massaget.kz тілшісі.
Президенттің кеңесшісі – баспасөз хатшысы Руслан Желдібайдың айтуынша, Мемлекет басшысының тапсырмасына сәйкес, балалар үйі көшірілмейді.
"Бағанашыл" балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды", — деп жазды Руслан Желдібай.
Аталған жағдайға байланысты Президент Әкімшілігі қызметтік тексеріс жүргізеді. Ата-анасының қамқорлығынсыз қалған балалардың заң шеңберіндегі барлық құқығы толық сақталатыны айтылды.
Еске салсақ, Алматыдағы «Баганашыл» балалар үйінің тәрбиеленушілерін 21 шілдеде өз еркімен көшіру әрекеті балалардың жылауына, есінен тануына, полиция мен жедел жәрдемнің келуіне ұласты.
Оқиға неден басталды?
2025 жылдың наурызында №1 облыстық балалар үйінің тәрбиеленушілері Алматыдан Қонаевқа көшіріліп жатқанын айтып шағымданған. Қоғам белсенділері Алматының элиталық ауданындағы – Баганашылдағы құнды жер телімі құрылыс компанияларының көзіне түсіп, олар тұрғын үй кешенін салғысы келеді деген пікір білдірген. Балалар жаңа ғимаратқа көшірілмеуін сұрап, бейнеүндеу де жолдаған.
Кейін Алматы облысының әкімі Марат Сұлтанғазиев балалар үйінің тәрбиеленушілерін Алматыдан қала сыртындағы жаңа ғимаратқа көшірмейміз деп сендірген болатын.
Алайда 11 шілдеде Мәжіліс депутаты Бақытжан Базарбек мекемені көшіру туралы бұйрықтың жарияланғанына наразы болып, наурыз айында билік Алматыдан көшірілмейді деп уәде бергенін еске салды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
