Алматыдағы "Бағанашыл" балалар үйінің тәрбиеленушілері тағы бір үндеу жасады, — деп хабарлайды Massaget.kz тілшісі.
Олар биліктен сөзінде тұруды сұрады.
"Сіздерден отбасымызды бөлмеуді сұраймыз. Себебі жөндеу жұмыстары кезінде бізді бөлмейміз деп уәде берген едіңіздер. Ал қазір бізге мүлдем басқа ақпарат жетіп жатыр", — деді балалар үндеуде.
Тәрбиеленушілердің сөзінше, бұған дейін оларға жөндеу жұмыстары келесі жылы көктемде басталады деп айтылған. Сонымен қатар, балаларға облысқа көшіру немесе отбасылық үлгідегі үйлер салу туралы айтылған.
Ал Алматы әкімдігі мәліметінше, "Бағанашыл" балалар үйінің тәрбиеленушілері өз орталығы аумағында тұрып, Алматы қаласында білім алуын жалғастырады.
"Қазір Алматы қаласы мен Алматы облысының әкімдіктері нысанды қала қарамағына беру жұмыстарын жүргізіп жатыр. Тәрбиеленушілерге заманауи әрі қауіпсіз жағдай жасау мақсатында балалар үйінің ғимаратына кешенді қайта жаңғырту жұмыстары жоспарланып отыр. Бұл жұмыстар тиісті рәсімдерден өткеннен кейін, яғни келесі жылы басталады", — деді әкімдік өкілдері.
Әкімдік өкілдері балалар бірінен бірі бөлінбейтінін мәлімдеді.
"Тәрбиеленушілер Алматы қаласындағы қазір өздері оқып жүрген мектепте білім алуын жалғастырады. Балаларды Қонаев қаласына көшіру мәселесі қарастырылып жатқан жоқ. Балалардың оқуы мен тұрмыс жайы әрдайым жіті бақылауда", — деп жазылған хабарламада.
Бұған дейін не болды?
2025 жылы наурызда №1 облыстық балалар үйінің тәрбиеленушілері мекеме Алматыдан Қонаев қаласына көшіріліп жатқанына шағымданды. Олардың үндеуі әлеуметтік желілерде пайда болды.
Кейінірек Алматы облысының әкімі Марат Сұлтанғазиев Алматы қаласындағы №1 балалар үйінің тәрбиеленушілерімен кездескен болатын.
"Біздің мақсатымыз — балалар өзін қауіпсіз сезініп, жан-жақты дамуы үшін қолайлы орта қалыптастыру. №1 балалар үйінің тәрбиеленушілері Алматыда қалады, ал жаңадан келетін балалар Қонаев қаласындағы заманауи кешенге орналастырылады", — деді бұған дейін өңір әкімі Марат Сұлтанғазиев.
Алайда Мәжіліс депутаты Бақытжан Базарбек әлеуметтік желіде Алматы облысы Білім басқармасының 2025 жылғы 10 шілдедегі "Арнаулы әлеуметтік қызметтерге мұқтаж балаларды қолдаудың облыстық орталығы" КММ-нің орналасқан жерін өзгерту туралы" бұйрығын жариялады.
Кейінірек Алматы облысы әкімдігі мәлімдеме жасады. Әкімдік мәліметінше, мекеме Қонаевқа көшіріле бастаған, себебі мекеме орналасқан ғимарат апат жағдайында тұр.
Артынша "Бағанашыл" балалар үйін Президент әкімшілігінен келген комиссия тексерді.
Өзекті жаңалықтарды өз уақытында оқу үшін Facebook парақшамызға жазылыңыз!
