Алматыда 13 адамның өмірін жалмаған хостелдегі өрт оқиғасына қатысты сот отырысы аяқталуға жақын. Бұл туралы бүгінгі отырыста судья Ернар Қасымбеков айтты. Сотта жәбірленушілердің кейбірі қайғылы жағдай үшінші тұлғаның қасақана әрекетінен болды деп есептеп отыр. Осы ретте қылмыстық істі прокурорға қайтаруды сұрады. Алайда судья істі прокуратураға қайтарудан бас тартты. Сот отырысынан әріптесім Айдана Қуантхан баяндайды.
Айдана Қуантхан, тілші:
Бұған дейінгі сот барысында ғимаратты жалға алған Әділбек Мұхамедьяровтың қорғаушысы қасақана өрт қойды деген нұсқаны алға тартты.
Айтуынша, куәгер Еркін Таңжарықов есімді азаматқа қатысты сотқа дейінгі тергеу барысында қасақана өртеу дерегі бойынша қылмыстық іс қозғалған. Жәбірленуші тараптың адвокаты да басқа адамды күдікті деп тану туралы қаулыны іске қосуды сұрады. Алайда прокурор, куәгер Еркін Таңжарықовқа қатысты айып тағылмағанын, оның іс-әрекеттері заңды түрде дәлелденбегенін, бірқатар тергеу және жедел-іздестіру шараларының жүргізілмегенін айтты. Ал Судья Ернар Қасымбеков, куәгер Еркін Таңжарықовтың іс-әрекетінде қылмыстық құқық бұзушылық болмауына байланысты іс тоқтатылғанын хабарлады. Сол себепті сот жәбірленушілер өкілінің істі прокурорға қайтару туралы өтінішін қанағаттандырудан бас тарту туралы шешім шығарды.
Айдана Қуантхан, тілші:
Еске сала кетейін, «Алматы хостеліндегі» өрт 2023 жылдың 30 қарашасында болды. 13 адам қаза тапты. Қылмыстық іс бойынша 2 адам айыпталып отыр. Олардың бірі ғимаратты жалға алған — Әділбек Мұхамедияров, ал екіншісі өрттен қорғау жүйесін орнату маманы Александр Пекельник. Келесі сот отырысы ертең болады
Айдана Қуантхан
